કોરોના વાઇરસ : કોરોના વાઇરસના દિલ્હીમાં જુલાઈ સુધીમાં સાડા પાંચ લાખ કેસ થશે : મનીષ સિસોદિયા

મનીષ સિસોદિયા

ઇમેજ સ્રોત, ANI

દિલ્હીના નાયબ મુખ્ય મંત્રી મનીષ સિસોદિયાએ કહ્યું છે કે રાજધાની દિલ્હીમાં 31 જુલાઈ સુધી કોરોના વાઇરસના સંક્રમણના કેસની સંખ્યા સાડા પાંચ લાખ થઈ શકે છે અને હૉસ્પિટલોમાં 80 હજાર પથારીઓની જરૂર પડી શકે છે.

ઉલ્લેખનીય છે કે દિલ્હીની હૉસ્પિટલોની પથારીઓ અને સારવારને લઈને રાજકીય ચર્ચા ચાલી રહી છે.

દિલ્હીની હૉસ્પિટલોમાં દિલ્હીવાસીઓનો જ ઇલાજ થશે એ મતલબના મુખ્ય મંત્રી અરવિંદ કેજરીવાલના નિર્ણયને એલજી અનિલ બૈજલે સોમવારે બદલી દીધો છે.

દિલ્હીમાં હૉસ્પિટલોમાં સારવાર માટે દિલ્હીવાસીઓ માટે પથારીઓ અનામત રાખવાને લઈ રાજકીય ખેંચતાણ તેજ થઈ ગઈ છે.

આ દરમિયાન દિલ્હીના સ્વાસ્થ્ય મંત્રી સત્યેન્દર જૈને સોમવારે કહ્યું હતું કે દિલ્હીમાં જૂન મહિનાના અંત સુધીમાં હૉસ્પિટલોમાં 15 હજારથી 17 હજાર પથારીઓ ઉમેરવાની જરૂર પડશે.

દિલ્હીમાં કેસોની વધી રહેલી સંખ્યાને જોતા આ સ્થિતિ કૉમ્યુનિટી ટ્રાન્સિશનની છે કે નહીં તેની વિગતવાર ચર્ચા કરવા આજે દિલ્હીના નાયબ મુખ્યમંત્રી મનિષ સિસોદિયાની અધ્યક્ષતામાં એક ઉચ્ચ સ્તરીય બેઠક પણ થઈ હતી.

કૉમ્યુનિટી ટ્રાન્સમિશનના મુદ્દે પણ ખેંચતાણ

ઇમેજ સ્રોત, Hindustan Times

દિલ્હીમાં કૉમ્યુનિટી ટ્રાન્સમિશન છે કે નહીં તે મુદ્દે ચર્ચા કરવા માટે આજે દિલ્હી ડિઝાસ્ટર મૅનેજમૅન્ટ ઑથોરિટીની પૂર્વ નિર્ધારિત બેઠક દિલ્હીના નાયબ મુખ્ય મંત્રી મનિષ સિસોદિયાના અધ્યક્ષસ્થાને મળી.

બેઠક પૂર્ણ થયા બાદ મનિષ સિસોદિયાએ પત્રકારોને કહ્યું કે કેન્દ્ર સરકારના અધિકારીઓના મતે હાલ દિલ્હીમાં કૉમ્યુનિટી ટ્રાન્સમિશન નથી અને આથી હાલ બેઠકમાં આ મુદ્દે ચર્ચા કરવાની જરૂર નથી.

સિસોદિયાએ કહ્યું કે આ બેઠકમાં કેન્દ્ર સરકારના અધિકારીઓ પણ હાજર હતા અને આ બેઠકમાં કેન્દ્રના અધિકારીઓએ આ મત વ્યક્ત કર્યો હતો.

દિલ્હી ડિઝાસ્ટર મૅનેજમૅન્ટ ઑથોરિટીની આ અગાઉથી નિર્ધારિત બેઠક હતી જેમાં દિલ્હીના લેફ્ટનન્ટ ગવર્નર અનિલ બૈજલ, દિલ્હીના નાયબ મુખ્ય મંત્રી મનિષ સિસોદીયા, દિલ્હીના સ્વાસ્થ્યમંત્રી સત્યેન્દર જૈન પણ ઉપસ્થિત હતા.

દિલ્હીના મુખ્ય મંત્રી અરવિંદ કેજરીવાલની તબિયત ખરાબ હોવાને કારણે તેમણે આ બેઠકમાં ભાગ લીધો ન હતો.

મંગળવારે સવારે અરવિંદ કેજરીવાલના કોવિડ-19ના પરીક્ષણ માટે નમૂના લેવાયા હતા જેનો રિપોર્ટ આવવો હજુ બાકી છે.

દિલ્હીના સ્વાસ્થ્ય મંત્રી સત્યેન્દર જૈને સમાચાર સંસ્થા એએનઆઈ સાથેની વાતચીતમાં કહ્યું હતું કે દિલ્હીમાં કૉમ્યુનિટી ટ્રાન્સમિશન છે કે નહીં એ અમે ત્યારે જ કહી શકીએ જ્યારે કેન્દ્ર સરકાર તેનો સ્વીકાર કરે.

જોકે, આ વાતચીતમાં તેમણે એવો સૂર વ્યક્ત કર્યો કે દિલ્હીમાં હાલ લગભગ અડધાથી વધુ કેસ એવા આવી રહ્યા છે જેના સ્રોતની જાણકારી ન હોય અને કૉમ્યુનિટી ટ્રાન્સમિશનમાં પણ આ જ સ્થિતિ હોય છે.

કેવી છે રાજધાનીની સ્થિતિ?

ભારતમાં કોરોના વાઇરસના કેસ

આ માહિતીને નિયમિત રીતે અપડેટ કરવામાં આવે છે, છતાં તેમાં કોઈ રાજ્ય કે કેન્દ્રશાસિત પ્રદેશના આંકડા તાત્કાલિક ન દેખાય તેવી શક્યતા રહેલી છે.

રાજ્ય કે કેન્દ્રશાસિત પ્રદેશ કુલ કેસ સાજા થયા મૃત્યુ
મહારાષ્ટ્ર 1351153 1049947 35751
આંધ્ર પ્રદેશ 681161 612300 5745
તામિલનાડુ 586397 530708 9383
કર્ણાટક 582458 469750 8641
ઉત્તરાખંડ 390875 331270 5652
ગોવા 273098 240703 5272
પશ્ચિમ બંગાળ 250580 219844 4837
ઓડિશા 212609 177585 866
તેલંગણા 189283 158690 1116
બિહાર 180032 166188 892
કેરળ 179923 121264 698
આસામ 173629 142297 667
હરિયાણા 134623 114576 3431
રાજસ્થાન 130971 109472 1456
હિમાચલ પ્રદેશ 125412 108411 1331
મધ્ય પ્રદેશ 124166 100012 2242
પંજાબ 111375 90345 3284
છત્તીગઢ 108458 74537 877
ઝારખંડ 81417 68603 688
ઉત્તર પ્રદેશ 47502 36646 580
ગુજરાત 32396 27072 407
પુડ્ડુચેરી 26685 21156 515
જમ્મુ-કાશ્મીર 14457 10607 175
ચંદીગઢ 11678 9325 153
મણિપુર 10477 7982 64
લદ્દાખ 4152 3064 58
આંદમાન નિકોબાર 3803 3582 53
દિલ્હી 3015 2836 2
મિઝોરમ 1958 1459 0

સ્રોત : આરોગ્ય અને પરિવાર કલ્યાણ મંત્રાલય, કેન્દ્ર સરકાર

કલાકની સ્થિતિ 11: 30 IST

દિલ્હીમાં પાછલા 24 કલાકમાં કોરોના વાઇરસ સંક્રમણના નવા 1007 કેસ નોંધાયા છે જેને ઉમેરતા દિલ્હીમાં કુલ કેસોની સંખ્યા 29743 પર પહોંચી ગઇ છે જેમાં ઍક્ટિવ કેસોની સંખ્યા 15416 છે.

દિલ્હીમાં કોવિડ-19ની મહામારીને કારણે કુલ મરણાંક વધીને 874 થઈ ગયો છે.

દિલ્હી વહીવટી તંત્રએ જાહેર કરેલા આંકડાને ટાંકીને સમાચાર એજન્સી પીટીઆઈએ માહિતી આપી કે દિલ્હીમાં 30 મેથી 6 જૂન વચ્ચે કોવિડ-19ને કારણે 62 લોકોનાં મોત થયા જેમાંથી 5 જૂને 27 લોકોએ જીવ ગુમાવ્યા છે.

દિલ્હીમાં અત્યાર સુધી સારવાર બાદ સ્વસ્થ થયેલા દર્દીઓની સંખ્યા 11357 છે.

તમે અમનેફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો