Asteroid : નાસાએ કહ્યું, બે કિલોમિટર મોટો ઉલ્કાપિંડ પૃથ્વીની નજીકથી પસાર થશે

ઉલ્કાપિંડ

ઇમેજ સ્રોત, Getty Images

અમેરિકાની સ્પેસ એજન્સી નાસા પ્રમાણે બુધવારે સવારે પૃથ્વીની નજીકથી એક મોટો ઉલ્કાપિંડ પસાર થશે જે આકારમાં આશરે બે કિલોમિટર જેટલો મોટો હશે.

નાસા પ્રમાણે આ ઉલ્કાપિંડ પૃથ્વી નજીકથી પસાર થશે પણ તેનાથી નુકસાનની શક્યતા નથી.

સંયુક્ત રાષ્ટ્રના ઍસ્ટરૉઇડ ડે નામના ટ્વિટર હૅન્ડલે પણ જાહેરાત કરી હતી કે 29 એપ્રિલે પૃથ્વીની નજીકથી ઉલ્કાપિંડ સુરક્ષિત રીતે પસાર થઈ જશે અને તેનું લાઇવ પ્રસારણ પણ દેખાડવામાં આવશે.

1998 ઓઆર2 નામનો આ ઉલ્કાપિંડ અમેરિકાના સમય પ્રમાણે સવારે 5.55 વાગ્યે પૃથ્વીની સૌથી નજીક આવી જશે.

નાસા પ્રમાણે આ ખગોળશાસ્ત્રીઓ માટે ઉલ્કાપિંડ પર અધ્યયન કરવાનો સારો અવસર છે.

આમ તો આ ઉલ્કાપિંડ પૃથ્વીથી ઘણાં મોટા અંતરે હશે પરંતુ ખગોળશાસ્ત્રીઓ માટે આ અંતર ઘણું નજીક કહેવાય.

આ ઉલ્કાપિંડ પૃથ્વીથી લગભગ 63 લાખ કિલોમિટર દૂરથી પસાર થઈ જશે , આ અંતર પૃથ્વી અને ચંદ્રમાં વચ્ચેના અંતર કરતાં આશરે 16 ગણું વધારે થયું.

નાસા પ્રમાણે 1998 ઓઆર2 ને જુલાઈ 1998માં નાસાના જેટ પ્રૉપલ્શન લૅબોરેટરીના નીયર અર્થ ઍસ્ટરૉઇડ ટ્રૅકિંગ પ્રોગ્રામ હેઠળ શોધવામાં આવ્યો હતો અને આશરે બે દાયકાથી ખગોળશાસ્ત્રીઓ તેના પર નજર રાખી રહ્યા છે.

એટલે તેની ઑર્બિટલ ટ્રૅજેક્ટરીને બહુ ચોક્કસાઈથી સમજી શકવાનો દાવો નાસા કરી રહ્યું છે.

નાસાનો દાવો છે કે આવનારા 200 વર્ષ સુધી આ ઉલ્કાપિંડની પૃથ્વી પર કોઈ અસર નહીં થાય.

અત્યાર બાદ આ ઉલ્કાપિંડ પૃથ્વીથી વર્ષ 2079માં પૃથ્વીની નજીકથી પસાર થશે અને ત્યારે તેનું અંતર પૃથ્વી અને ચંદ્રના અંતરથી ચારગણું હશે.

નાસાનું કહેવું છે કે આટલા મોટા ઉલ્કાપિંડનું પૃથ્વીની નજીકથી પસાર થવું એ અનોખી ઘટના છે.

છેલ્લે આવો મોટો ઉલ્કાપિંડ ઍસ્ટરૉઇડ ફ્લૉરેન્સ વર્ષ 2017માં પૃથ્વી નજીકથી પસાર થયો હતો, તે આકારમાં પાંચ કિલોમિટર મોટો હતો અને પૃથ્વી તથા ચંદ્રના અંતરથી 18 ગણાં અંતરે પૃથ્વી પાસેથી પસાર થયો હતો.

નાસાનું કહેવું છે કે દર પાંચ વર્ષે સરેરાશ ઍસ્ટરૉઇડ પૃથ્વીની નજીકથી પસાર થતા હોય છે.

આ પ્રકારના ઉલ્કાપિંડ પર દૂરબીનથી નજર રાખી શકાય છે.

નાસાનો દાવો છે કે 1998 ઓઆર2ના આકારના 98 ટકા જેટલા ઉલ્કાપિંડ અથવા તેનાથી મોટા આકારના ઉલ્કાપિંડને શોધીને ટ્રૅક કરવામાં આવી રહ્યા છે.

તમે અમનેફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો