Shugaba Muhammadu Buhari na son gyara halayen 'yan Nigeria

A ranar Alhamis ne shugaba Muhammadu Buhari ya kaddamar da wani shirin da aka yi wa take da "change begins with me" wanda ke nufin sai na sauya dabi'una za a samu sauyin da ake bukata.

Shugaban ya kaddamar da wannan shiri ne da nufin samun sauyi a dabi'un mutane, wanda ake sa ran hakan zai samar da cigaba a Najeriya.

Da yake kaddamar da shirin a fadarsa, shugaban kasar Muhammadu Buhari ya ce yanzu babu abin da ke tafiya dai-dai a kasar.

Ministan yada labarai na kasar, Lai Mohammed ya ce shirin zai ilmantar da mutane a kan mahimmancin kyautata dabi'u.

Ya ce shirin zai taimaka wajen farfado da kima da rikon amana da kuma kwatanta kyawawan hallaya, a duk inda mutum ya tsinci kansa.

Mista Lai ya kara da cewa shirin zai daga daraja da kimar kasar a idanun duniya.

A shekaru 31 din da suka gabata, a lokacin da Buhari yake mulkin soja, shugaban ya kaddamar da wani shiri makamancin wannan domin yaki da rashin da'a a kasar.

An yi wa shirin lakabi da 'War Against Indiscipline' wato Yaki da Rashin Da'a.

Manyan matsalolin da Najeriya ke fama da su, su ne rashawa da cin-hanci da rashin girmama dokokin kasa.

Sharhi

Wasu dai na ganin kamar shirin shugaban na yaki da rashin da'a ba shi ne mafi a'ala ba, a inda wasu ke cewa hakan ya dace.

'Yan kasar dai na fama da kuncin rayuwa sakamakon tabarbarewar tattalin arziki da kasar ta samu kanta a ciki.

Masana dai na alakanta tabarbarewar tattalin arzikin da wasu tsare-tsaren gwamnati.

Gwamnatin Buhari dai ta cire kudaden tallafin man fetur da rage darajar Naira.