Tattalin arzikin Nigeria ya kara samun nakasu

Alkaluman da hukumomi suka fitar sun nuna cewa tattalin arzikin Najeriya ya kara samun nakasu da kashi 2.2 cikin dari a watanni uku da suka gabata.

A bayanin da ta fitar a ranar Litinin, Hukumar kula da kididdiga ta NBC ta ce a bana, karfin tattalin arzikin kasar ya ragu da kashi 2.24 cikin dari.

Ana danganta wannan nakasu ne da karancin kudaden waje da 'yan kasuwa ke fama da shi da kuma hare-haren da masu tayar da kayar baya ke kaiwa a yankin Niger Delta.

Najeriya na fuskantar rikicin tattalin arziki mafi muni a cikin shekaru 20.

Sai dai rahoton ya ce tattalin arzikin ya bunkasa a bangaren da bashi da alaka da man fetur, sannan ana samun ci gaba a fannin noma.

Faduwar darajar mai a kasuwannin duniya ta haifar da karancin kudaden shiga ga kasar, wacce tattalin arzikinta ya dogara a kan man fetur.

Wannan lamari ya haifar da hauhawar farashi da karancin kudaden waje, abin da ya kai ga faduwar darajar kudin kasar - wato naira.

Miliyoyin 'yan kasar na fama da hauhawar farashi mafi girma a cikin sama da shekaru goma.

Wani wakilin BBC a Najeriya ya ce gwamnati za ta yi jin tsoron cewa karuwar marasa ayyukan yi ka iya sa mutane su yi bore.