Zola ya zama kocin Birmingham

Zola tsohon dan wasan Chelsea da Italiya

Asalin hoton, Getty Images

Bayanan hoto,

West Ham da Cagliari da Al-Arabi ta Qatar duk sun sallami Gianfranco Zola

Kungiyar Birmingham City ta gasar Championshiop ta kasa da Premier, ta nada Gianfranco Zola ya maye gurbin Gary Rowett wanda ta kora a matsayin kocinta.

Zola mai shekara 50, wanda tsohon dan wasan Chelsea ne da Italiya, ya kulla yarjejeniyar shekara biyu da rabi ne da kungiyar.

A ranar Laraba ne kungiyar ta Birmingham wadda ke matsayin ta bakwai a teburin gasar ta 'yan dagaji, ta kori Rowett bayan sama da shekara biyu yana mata kociya.

Wasan farko da Zola zai jagoranci kungiyar shi ne na ranar Asabar a gida da ta daya a teburinsu Brighton.

Aikin koci na karshe da Zola ya yi a Qatar ne da kungiyar Al-Arabi wadda ta kore shi a watan Yuni, bayan shekara daya kawai .

Kafin wannan tsohon dan wasan na Italiya ya yi kocin West Ham, da kungiyar Cagilari ta Serie A .