Kun san yawan kudin da Google ya samu a karshen 2018?

Alphabet continues to remain a dominant force in online advertising Hakkin mallakar hoto Getty Images
Image caption Google ne ke tara wa kamfanin Alphabet yawancin kudin shigar da yake samu

Kamfanin Alphabet wanda shi ne ya mallaki kamfanonin Google da YouTube da kuma kamfanin salula na Android ya sanar da cewa ya sami bunkasa ta fannin hada-hadar kasuwanci.

Bayanan sakamakon kasuwancin sun ta'allaka ne a watanni uku na karshen shekarar 2018.

Amma masu zuba jari a kamfanin na dari-dari da hannayen jarin kamfanin saboda rashin cimma matakin da aka yi hasashen hannun jarin kamfanin zai yi.

Kamfanin ya sami bunkasa musamman a fannin tallace-tallace ta intanet, fagen da shi ke kan gaba a duniya, inda ya sami fiye da dala biliyan 39.

Wannan ya zama karuwar kashi 22 cikin 100 kenan idan aka kwatanta da abin da ya samu a watanni uku na karshen shekarar 2017.

Yawancin kudaden dsa kamfanin na Alphabet ya samu sun fito ne daga tallace-tallace da sashin kamfanin na Google ya samar - kimanin dala biliyan 32 da miliyan 600.

Amma kamfanin na kara kashe kudade masu yawa wajen inganta wannan sashin nasa mai kula da talace-tallace.

Kudaden da kamfanin ya kashe a wannan fannin ya zarce dala biliyan 7 a watanni uku na karshen shekarar ta bara, wanda ke nuna karuwar kusan dala biliyan daya idan aka kwatanta da abin da ya kashe a bara.

Amma duk da haka, masu zuba jari a kamfanin sun tsorata da rashin karsashin da hannun jarin kamfanin ke nunawa.

Lamarin da ya sanya farashin hannun jarin kamfanin na Alphabet ya fadi da kashi 2 cikin 100 jim kadan bayan an bude kasuwannin hannayen jari.

Labarai masu alaka