An kayyade kayan aure a Somalia

Wasu ma'aurata a birnin Mogadishu da ke Somalia Hakkin mallakar hoto Reuters
Image caption A al'adance a Somalia amarya kan sanya wata sutura a kan kayanta

A wani gari da ke Somalia an hana bikin aure na kece raini, a wani mataki na bai wa matasa kwarin gwiwa su zauna a gida su yi aure maimakon yin kaura.

Cikin sabbin ka'idojin da aka gindaya sun hada da hana walimar aure a manyan otel da yanka akuyoyi uku na abincin biki.

Kwamishinan garin Beled Hawa, Mohamud Hayd Osman ya shaida wa BBC hakan.

Jami'in ya kuma bayyana adadin kudaden da za a kashe wajen kayan dakin amarya kada su wuce dala 600, yayin da dukiyar aure kuma kada ta wuce dala 150.

Gidan angwaye na kashe har dala 5000 a wajen bikin aure a Somalia.

Wakilin BBC Somali, Bashir Mohamed ya ce dokokin sun kunshi kudaden da ake kashewa da suka hada da dukiyar aure da walima da kayan sawa da gwala-gwalan amarya da kuma kayan daki.

"Musulunci ya nuna cewa bai kamata a dinga tsawwalawa ba a wajen aure" A cewar Malam Osman ya shaida wa sashen BBC Somali.

A cimma matakin rage kashe kudaden 'Kece rainin ne' bayan wata ganawa da jami'ai suka yi a sanadin haihuwar yara 150 ba tare da aure ba a garin.

"'Yan mata ba sa son yin aure har sai an kashe musu makudan kudade wajen sayen gwala-gwalai da kuma kayan daki. " In ji jami'in.

Ana cikin wani hali a garin na Beled Hawa da ke makotaka da kasar Kenya, saboda fari da kuma rashin aikin yi --ga tsadar aure, lamarin da yasa samari ke barin garin a cewar kwamishinan.

"Dole a taimakawa 'yan mata su auri zamarin da suke su saboda a samu ci gaba a al'umma," In ji shi.

Inda ya dala $600 zai isa sayen babban gado da teburi da kujeru da kuma sauran kayan girki.

A al'adance dai ana shafe tsawon mako guda ana bikin aure a Somalia.

Labarai masu alaka