Nigeria: Malaman Jami'o'i sun janye yajin aiki

Wasu daliban jami'ar Lagos Hakkin mallakar hoto Getty Images
Image caption ASUU ta dakatar da yajin aikin ne bayan wata daya da kwana shida

Kungiyar malaman jami'o'i ta Najeriya, ASUU, ta sanar da dakatar da yajin aikin da ta shiga na sai-baba-ta-gani bayan sama da wata daya.

Shugaban kungiyar Farfesa Biodun Ogunyemi ne ya sanar da janyewar, ranar Litinin da daddare jim kadan bayan wata ganawa da Ministan kwadago da ayyuka, Dakta Chris Ngige, a Abuja.

Kungiyar ta ce ta dakatar da yajin aikin ne wanda ta shafe wata daya da kwana shida, har zuwa karshen watan Oktoba, lokacin da gwamnati za ta cika alkawarun da ta yi.

Matakin dai ya biyo bayan tarukan tattaunawar da aka rika yi ne tsakanin masu ruwa da tsaki a harkar ilimi, musamman ma'aikatar ilimin da kuma ta kwadago da ayyuka.

Kungiyar ta umarci malaman jami'o'i da su koma bakin aiki daga ranar Talata.

Kungiyar ta ASUU ta shiga yajin aikin ne na sai-abin-da-hali-ya-yi, ranar 13 ga watan Agusta, sakamakon gazawar gwamnati ta aiwatar da yarjejeniyar da suka yi a watan Nuwamba na 2016.