Ba zan amince da zaman benci ba — Bale

Gareth Bale ya lashe kofin zakarun Turai sau hudu
Image caption Gareth Bale ya lashe kofin zakarun Turai sau hudu

Gareth Bale, wanda shi ne ya taimaka wa Real Madrid ta lashe kofin zakarun nahiyar Turai, ya ce bai gamsu da yadda kociyan Madrid din Zinadine Zidane, ke kin sanya shi a wasa yadda ya kamata ba.

Wannan takaddama dai ta taso ne bayan da shi Bale din ya zura kwallaye na ji da gani har guda biyu a wasan karshe na zakarun nahiyar Turai, wanda hakan ya bai wa kungiyar tasa nasara a kan Liverpool da ci uku da daya.

Ina so na rinka yin wasa a kowanne mako, amma ban samu hakan ba a nan, a kan wani dalili da ban tabbatar ba, in ji Bale

Ya kara da cewa idan bai samu damar buga wasanni sosai a Real Madrid din ba, to zai zauna ya yi tunanin makomarsa.

Bale ya lashe kofin zakarun nahiyar Turai sau hudu zuwa yanzu a zaman sa a kungiyar ta Real Madrid da ke kasar Spaniya.

Akwai yi wuwar cewa kungiyoyi da dama za su iya yin zawarcinsa idan ya nuna aniyar barin kungiyar tasa.

A baya dai kungiyar Manchester United ta taba nuna sha'awarta kan zawarcin dan wasan.

Sai dai ba kowacce kungiya ce za ta iya biyan sa kudin da Real Madrid ke ba shi ba, domin ana ganin cewa Bale, na daukar albashi da ya kai Fan dubu 400, bayan an cire haraji a kowanne mako.

A sheakarar 2013, ne Real Madrid ta sayi Bale daga Tottenham a kan zunzurutun kudi fan miliyan 86.

Bale yana da kwantiragi da Real Madrid wadda za ta kare a shekara ta 2022.