Tsoffin 'yan sabuwar PDP sun fasa ganawa da Osinbajo

Bukola Saraki Hakkin mallakar hoto Twitter/Saraki
Image caption Bukola Saraki ya dade yana takun saka da shugaban rundunar 'yan sandar kasar

Tsoffin 'yan sabuwar PDP da suka hada da shugaban majalisar dattawa, Bukola Saraki, da shugaban majalisar wakilai, Yakubu Dogara, sun dakatar da ganawar da za su yi da Mataimakin Shugaban Najeriya Yemi Osinbajo.

A ranar Litinin ne bangarorin biyu suka shirya ganawa da juna, kamar yadda aka tsara tun farko.

Wata sanarwa da Alhaji Abubakar Kawu Baraje, shugaban 'yan PDP sabuwa ya raba wa manema labarai ta ce hankalinsu ya tashi tun bayan ganawar da suka yi da Mista Osinbajo saboda yadda fadar shugaban kasar take yi wa wadansu shugabannin majalisa bita da kulli.

A ranar Lahadi ne 'yan sandan suka ce wasu mutane da ake tuhuma da fashin ne suka ce "Saraki ne ya ke daukar nauyinsu", a don haka suka gayyace shi domin ya amsa tambayoyi.

Sai dai Sanata Bokola Saraki ya musanta zargin 'yan sandan.

Sai dai kawo yanzu gwamnatin Najeriya ba ta ce komai ba game da kalaman Alhaji Kawu Barajen.

"Saboda wadannan abubuwan da ke faruwa ne a cikin sa'o'i 24 ya sa bangarenmu ya janye daga tattaunawa da bangaren shugaban kasa," a cewar Alhaji Kawu Barajen.

Shugaban Majalisar Dattawa Bukola Saraki ya dade yana takun saka da shugaban rundunar 'yan sandar kasar.

Ana tattaunawar ne dai a wani kokarin sulhunta rashin jituwar da ke tsakanin bangarorin biyu.