Rikicin Boko Haram ya wuce - Buhari

Shugaba Buhari Hakkin mallakar hoto Presidency

Shugaban Najeriya Muhammadu Buhari ya ce yanzu yankin arewa maso gabashin kasar yana matakin daidaita lamurra bayan rikicin Boko Haram.

Da ya ke jawabi ga sojojin Najeriya a garin Munguno a ziyarar da ya kai jihar Borno a ranar juma'a, Buhari ya ce "ta tabbata cewa yanzu muna cikin mataki ne na kokarin daidaita lamurra bayan rikici Boko Haram, kuma hakan ya samu ne saboda kyakkyawan aikin sojojinmu.

Shugaban ya kuma ce mayakan Boko Haram da kansu suke mika wuya, kamar yadda kamfanin dillacin labaran AFP ya ruwaito.

Mai ba shugaban shawara kan yada labarai Femi Adeshina ya wallafa hutunan ziyarar shugaban a Borno inda ya ce Buhari ya kuma kaddamar da wasu tankokin yaki na gida da aka kera.

Bayanin shugaban a Munguno kamar yana nufin an kawo karshen tashin hankalin da jihohin arewa maso gabashin Najeriya suka yi fama da shi a kusan shekara tara.

Rundunar sojin Najeriya da gwamnatin Buhari sun dade suna ikirarin kawo karshen rikicin Boko Haram wanda ya yi sanadin salwantar dubban rayuka a arewacin Najeriya tare da raba miliyoyi da gidajensu.

Tun a yakin neman zabensa, Buhari ya alwashin zai kawo karshen rikicin Boko Haram da ya shafi kasashen da suka kewaye tafkin Chadi, Nijar da Kamaru da Chadi.

Sai dai kuma har yanzu Boko Haram na ci gaba da yin barazana a yankunan inda ko a watan da ya gabata an kashe mutane 43 a hare haren kunar bakin wake da aka kai a garin Damboa a jihar Borno.

Kashe-kashen da ake samu a rikicin makiyaya da manoma da kuma harin 'yan fashi a wasu jihohin Najeriya wani babban kalubale ne na tsaro ga Buhari wanda ya ayyana neman wa'adin shugabanci na biyu.

Hakkin mallakar hoto Presidency
Image caption Buhari ya kaddamar da wasu tankokin yaki na gida da aka kera.