Hotunan yadda aka ceto yaran da suka makale a kogo

Hakkin mallakar hoto Getty Images
Image caption Nasarar da aka samu bayan kwanaki 17 ana aikin ceto ya janyo hankalin duniya

Zakuwar da aka nuna wajen kokarin ceto wata tawagar wasu matasa 'yan kwallon kafa a wani kogo da ya yi ambaliya a Thailand ta ja hankalin duniya.

Mun yi waiwaye kan yadda lamarin ya faru, bayan da aka ceto 'yan samarin na karshe da suka saura da kuma kocin su a ranar Talata.

A ranar Asabar 23 ga watan Yuni ne wasu mambobin wata kungiyar kwallon kafa ta 'Wild Boar' masu shekaru tsakanin 11 zuwa 16 sun shiga Kogon Tham Luang da ke lardin Chiang Rai a kasar Thailand tare da kocinsu bayan da suka kammala atisaye.

Mazauna yankin sun san yadda tsarin kogon mai zurfin kilomita 10 yake, kogo ne mai matsatsi da kuma zurfi sosai.

'Yan wasan sun sha ziyartar kogon a baya, amma a wannan karon ruwan sama mai yawa ya haddasa ambaliya har suka kasa fita.

Bayan da aka ga yaran ba su koma gida ba, sai iyayensu suka kai rahoton batan 'ya 'yan nasu, sai aka fara neman su.

Masu aikin ceto na farko a yankin sun ce sun gano kekunan yaran da takalmansu na kwallo da sauran kaya da ke kusa da kofar kogon.

Hakkin mallakar hoto AFP/Getty
Image caption Kekunan yaran a kusa da kofar shiga kogon
Hakkin mallakar hoto EPA
Image caption Masu ceto a bakin kogon suna tattaunawa

'Yan jarida da masu aikin sa kai sun taru a bakin kogon duk da ana ruwan sama mai karfi don shawarta yadda za su aiwatar da tsarin ceto yaran.

A ranar Lahadi duk 'yan uwan yaran da sauran mutane sun je bakin kogon suka yi ta addu'o'i.

Hakkin mallakar hoto Getty Images
Image caption Hoton wata mata da aka dauka a wajen kogon tana addu'a a ruwan sama

Bayan da suka shafe kwana uku a kogon, sai masu nutso daga rundunar sojin ruwan Thailand suka je domin taimakawa wajen kokarin bincike.

An samu gano sabbin sawayen hannu da na kafa a cikin kogon, al'amarin ya bai wa mutanen fatan samun yaran da rai.

Jami'an gwamnati sun ziyarci wajen, kuma mataimakin Firai Minista Prawit Wongsuwon ya ce gwamnati ta na sa ran za a samu yaran da rai.

Masu ceto sun yi tunanin bin wasu hanyoyin don shiga ciki- tawagogin sojoji kuma suka ci gaba da neman zabin wasu hanyoyin na fasa dutsen don samun hanya.

Hakkin mallakar hoto AFP/Getty
Image caption Masu aikin ceto dauke da tulun iska a bakin kogon
Hakkin mallakar hoto AFP/Getty
Image caption Sojoji sun saka wayar wuta domin samun haske a kogon

A ranar Laraba 27 ga watan Yuni ne wasu kwararrun masu ninakaya daga kasashen duniya daban-daban suka isa Thailand don taimakawa wajen neman yaran.

Iyalan yaran sun ci gaba da yin addu'a a wajen, a yayin da aka ci gaba da damuwa kan abun da ka iya samun yaran. An yi ta daukar hotunan dangin yaran da jami'ai suna suma, da kuma yadda ake ta nuna damuwa kan abun da ka-je-ya-zo na munin yanayi na tsammanin ruwan sama kamar da bakin kwarya.

A hankali dai Thailand ta fara samun sa'ida ganin yadda ake tsaurara bincike, tare da fatan cewa za su tsira. Masu amfani da shafukan sada zumunta sun yi ta yada sakon girmamawa kan batan yaran inda suke kiransu da "mutanen da muke tsananin son haduwa da su."

Hakkin mallakar hoto Twitter/@namwoon_ccw
Image caption Zane mai nuna yaran suna rungumar masu ceto

An kawo bututan zuke ruwa don rage yawan ruwan da ke cikin kogon, amma ruwan saman da aka ci gaba da yi yana dakatar da kokarin aikin ceton.

Daga baya masu aikin ceto sun yi amanna da fatan cewa tawagar yaran suna cikin aminci a cikin wani surkuku da ke can cikin kogon da ake kira "Patayya beach".

Hakkin mallakar hoto Reuters
Image caption 'Yar uwar yaran cike da bakin ciki
Hakkin mallakar hoto Reuters
Image caption Firai Ministan Thailand na sauraron iyayen yaran

Firai Minista Prayuth Chan-ocha ya ziyarci dangin yaran a wajen kuma ya yi kokarin kwantar musu da hankali tare da ce musu: "Yaran 'yan wasa ne kuma suna da karfin zuciya."

Kafofin watsa labaran duniya duk sun taru a wajen tare da 'yan jaridu duk kuwa da irin tabon da ke wajen, don samun sabbin labarai da dumi-duminsu.

Hakkin mallakar hoto Getty Images
Image caption Manema labarai da dama sun taru a wajen kogon

A karshen mako 30 ga watan Yuni an samu ruwan sama ya dan dauke, wanda hakan ya bai wa masu ninkaya damar ci gaba da kutsawa cikin kogon.

An shigar da tulunan shakar iska da wasu kayayyakin bukata a lokacin da masu ceto suka kara samun sararin kutsawa cikin kogon.

Hakkin mallakar hoto AFP/Getty
Image caption Masu gyara suna saka abun janyo ruwa a kusa da kogon

A ranar Litinin 2 ga watan Yuli aka samu babban bayani - inda masu ninkiya suka kai wurin da yaran da coachinsu suke cikin halin lafiya, bayan kwana 10 da batan nasu.

A same su a kan wani dutse kusan kilomita hudu daga bakin kogon.

Hakkin mallakar hoto Royal Thai Navy
Image caption An fitar da bidiyo da ya nuna lokacin da masu ninkiya na kasar birtaniya suka ga yaran
Hakkin mallakar hoto AFP/Getty
Image caption Jama'a da jami'ai sun ji dadi da suka ji bayanin gano yaran

Bidiyon da ke nuna 'yan mazan a cikin koshin lafiya ya fito daga hannun rundunar sojin ruwan Thailand amma jami'ai sun tunasar da cewa karkarin ceto yana ci gaba da bada wahala.

An kai musu abinci da magunguna a yayin da masu aikin ceton ke shawarar yadda za a yi a fitar da su.

An fitar da miliyoyin lita na ruwa daga cikin kogon, amma wani ruwan ya ci gaba da taruwa saboda yanayin damuna da ake ciki, jami'ai sun yi gargadin cewa dole yaran su koti ninkaya kafin a fitar da su - ko su jira tsawon watanni har sai damuna ta janye.

Hakkin mallakar hoto Getty Images
Image caption Manyan motoci a gaban kogon masu aikin taimako
Hakkin mallakar hoto Getty Images
Image caption Hoton tulunan iska a wajen kogon

An shiga wani yanayi na damuwa a bakin kogon yayin da daya daga cikin masu ninkaya da ke aikin ceton ya mutu a karshen mako.

An bayyana cewa Saman Gunan mai shekara 38 wanda tsohon sojan ruwa ne da ya zabi yake taimakon sa kai don ceto yara, ya mutu a sanadiyar karewar iska a tukunsa a hanyarsa ta kai musu agaji.

Hakkin mallakar hoto Reuters
Image caption Sojoji dauke da gawar Saman Gunan

An yi ta bayyana sakonnin yabo da jinjina ga mamacin da kuma nuna damuwa kan yadda ceto yaran zai kasance.

Kwamandan jiragen ruwa na Thailand ya yi gargadin cewa iskar numfashi na kara yin kasa, kamar yadda aka gani a sakonnin da tawagar da kocin suka rubuto.

Hakkin mallakar hoto Getty Images
Image caption Daya daga cikin yaran ya rubutawa 'yan uwanshi wasika inda ya ce kada su damu suna da karfi

A lokacin da ake jira ruwan sama ya tsagaita sai jami'ai suka fara tunanin tsara wata mafita da suka yi amannar in an bi za a iya tserar da tawagar.

Da yanayin ya dan fara sauyawa, sai aka yi sa'a aka fara aiwatar da aikin ceton ka-in-da-na'in ranar Lahadi 8 ga watan Yulu

An ga motocin ceto suna barin wurin, abun da ya sa mutane tunanin ko me ya faru da koma yadda ceton ya ke tafiya. Sai daga baya aka bayyana cewa an ceto yara hudu.

Jami'ai sun tabbatar da cewa komai na tafiya lafiya, amma dole ake dakatawa idan dare ya yi domin a cika tulunan iskar sannan masu ceton su huta.

Hakkin mallakar hoto Reuters
Image caption Motar asibiti ta bar wurin inda 'yan jarida ke sa ido su ga mai ke faruwa

Aikin na da wahala kuma ya hada da tafiya da hawa dutse da kuma ninkiya a gefen igiyoyi da aka riga aka dauwrawa a bango.

A karshen ranar Litinin aka sake fiddoo da wasu yara hudun.

Hakkin mallakar hoto Getty Images
Image caption Wadanda aka ceto na asibiti inda ake ba su abinci ta kulawa
Hakkin mallakar hoto Reuters
Image caption Abokan karatun yaran na murnar ci gaban aikin

Gwamnatin tana boye bayanai kan yadda aikin ceton ke gudana, ciki har da sunayen wadanda aka ceto.

Ana kai yaran asibiti domin kulawa. An takaita bai wa iyayen yaran damar ziyartarsu a asibiti saboda kare duk wani abu da zai yi barazana ga lafiyarsu.

A ranar Talata aka kara samun cikakken fatan ceto dukkan sauran wadanda suka rage.

Hakkin mallakar hoto Reuters
Image caption Locals pictured waving at ambulances driving out of the rescue site

Ana ci gaba da aikin ceton a ranar Talata, har sai da aka kammala fiddo da duk yaran 13 da kocinsu.

Mutanen yankin da kuma masu aikin ceto sun yi ta murna, kana daga bisani aka kai yaran da kocinsu asibiti, bayan da suka shafe kwana 17 a cikin kogon da ke karkashin kasa.

Hakkin mallakar hoto Getty Images
Image caption Mutane da dama sun yi ta murna bayana da suka ga yadda aikin ceton ke gudana a talbijin
Hakkin mallakar hoto Getty Images
Image caption Wata yarinya ta saka tambarin kungiyar kwallon yaran ta Wild Boar wacce kowa ya san ta

Labarai masu alaka