Ngozi Okonjo-Iweala ta zama darakta a kamfanin Twitter

Ngozi Okonjo-Iweala Hakkin mallakar hoto Getty Images
Image caption Ngozi Okonjo-Iweala ita ce mace ta farko da ta fara zama ministar kudi a Najeriya

Kamfanin sada zumunta na Twitter ya nada tsohuwar Ministar Kudin Najeriya Ngozi Okonjo-Iweala a matsayin daya daga cikin daraktocinsa.

Kamfanin wanda yake da hedkwata a jihar California ta kasar Amurka ya bayyana hakan ne a ranar Alhamis.

Misis Okonjo-Iweala ita ce mace ta farko da ta fara zama ministar kudin kasar da kuma ministar harkokin waje a tsakanin shekarun 2003 zuwa 2006.

Har ila yau ta kara sake zama ministar kudin kasar kuma mai kula da harkokin tattalin arziki a zamanin mulkin Shugaba Goodluck Jonathan.

Shugaban kamfanin Omid Kordestani ya ce yana yi wa Misis Okonjo-Iweala da Mista Robert Zoellick, wanda shi ma kamfanin ya dauke shi aiki a matsayin darakta, maraba kamar yadda ya bayyana a shafinsa na Twitter.

Ita ma Okonjo-Iweala ta bayyana farin cikinta da sabon matsayin, kamar yadda ta bayyana a shafinta na Twitter.

Tsohuwar ministar ta taba yin aiki da bankin duniya, inda ta shafe fiye da shekara 20 a hedkwatarsa da ke birnin New York na Amurka.

Karanta wadansu karin labarai

Labarai masu alaka