Yadda matasa suka sace tare da kashe wani yaro a Kano

'Yan sanda na binciken wata gawa a Kano Hakkin mallakar hoto Nigeria Police
Image caption A wannan kangon ne 'yan sanda suka tono gawar yaran da aka kashe

Rundunar 'yan sanda a jihar Kano ta arewacin Najeriya ta ce ta kammala bincike domin gurfanar da wasu matasa da take zargin cewa su ne suka sace wani yaro dan shekara biyar, wanda ya rasu a hannunsu, ciki har da kanin mahaifiyar yaron.

'Yan sanda sun kama matasan uku ne a Unguwar Karkasara.

An sace yaron ne da hadin bakin wanda ke raka shi makaranta, inda suka nemi a basu naira miliyan 50, a cewar Kwamishinan 'yan sandan jihar Ahmed Ilyasu.

Bayanai sun ce wadanda suka sace shi sun ba shi kwayoyi sannan suka daure masa baki, lamarin da ya yi sanadiyyar mutuwarsa, sannan suka binne shi a wani kango.

"Da jin labari sai muka bazama nemansu, kuma muka kama daya daga cikinsu wanda ta dalilinsa ne muka kai ga cafke ragowar," a cewarsa.

Kwamishina Ahmed Ilyasu ya ce mutuwar yaran ce ta sa suka rage kudin da suka nema zuwa 100,000.

Ya kara da cewa "dubunsu ta cika ne bayan da suka fito karbar kudin da suka nema, inda ma'aikatanmu suka yi musu kwantan-bauna, sannan muka kama su".

'Yan sanda sun kuma tono gawar yaran, wadda suka ce babu abin da ya same ta.

Abin takaici da rashin imani shi ne barayin, wadanda shekarunsu suka kama daga 19 zuwa kasa, na "da alaka da iyayen yaran ne," in ji shugaban 'yan sandan na Kano.

Kwamishina Ilyasu ya ce da zarar an kammala bincike za a gurfanar da wadanda ake zargi a gaban kotu.

Batun satar mutane domin karbar kudin fansa na ci gaba da bazuwa a sassan Najeriya daban daban.

Wannan ne ya sa kwamishinan 'yan sandan ya yi kira ga jama'a da su rinka lura da irin mutanen da suke hulda da su, domin bayar da bayani ga hukumomi da zarar sun ga wani abu da ba su gamsu da shi ba.

Labarai masu alaka