Tsangayar Asali: Yadda fim kan asalin almajirci ya ja hankalin Gwamnan Kano Ganduje

Abdullahi Umar Ganduje

Asalin hoton, Hassan Giggs

Bayanan hoto,

A Fadar Gwamnatin Kano aka yi bikin ƙaddamar da fim ɗin Tsangayar Asali

Gidauniyar KDC da kungiyar Motion Pictures Production sun hada gwiwa da gwamntin Jihar Kano da ke Najeriya wajen kaddamar da wani fim kan almajirci.

Fim din mai suna Tsangayar Asali an shirya shi ne domin yin waiwaye kan asalin almajirci a arewacin Najeriya da kuma irin tasirinsa ga rayuwar al'ummar yankin, a cewar daraktansa Hassan Giggs.

Ya kara da cewa wani abin ban sha'awa shi ne yadda fim din yake nuni da irin sauye-sauyen da suka kamata a yi wajen inganta almajirci.

Asalin hoton, Hassan Giggs

Tsangayar Asali, wanda aka kaddamar da shi a wurin wani biki da aka yi a fadar gwamnatin jihar Kano, yana fadakarwa kan yadda za a gina wa almajirai azuzuwa da sanya tsarin boko a cikin manhajarsu da kuma bayar da kudin makaranta kamar yadda ake yi a tsarin makarantun boko.

Hassan Giggs ya ce hakan zai sa almajirai su samu nutsuwa wajen koyon karatun Alkur'ani ba tare da sun rika fita yawon barace-barace ba.

Manyan masu ruwa da tsaki ne suka halarci wurin kaddamar da fim din na Tsangayar Asali cikinsu har da Gwamna Abdullahi Umar Ganduje, da mataimakinsa Nasiru Gawuna, Sarkin Bichi Nasiru Ado Bayero da kuma malaman addini.

Jaruman da suka fito a fim din sun hada da Hadizan Saima, Malam Inuwa, Abdul U. Zada, Nura Sharu da Baba Sadiq.