Amai da gudawa ya kashe mutane 40 a Bauchi

Taswirar Najeriya
Image caption An dade ana fama da barkewar amai da gudawa a wasu jihohin Najeriya

Rahotanni daga Najeriya sun ce sama da mutum arba`in ne suka rasu sakamakon barkewar cutar amai da gudawa a jihar Bauchi da ke Arewa-maso-Gabashin kasar.

Mahukunta a jihar sun bayyana cewa cutar ta yi kamari ne a fadar jihar da kuma karamar hukumar Ganjuwa.

Sai dai a cewarsu yanzu sun shawo kan al`amarin. Rashin ingantaccen ruwan sha na daga cikin abubuwan da ke haddasa cutar amai da gudawa a lokuta da dama.

Har ila yau mahukunta a jihar Bauchi sun tabbatar da cewa sama da mutum dubu daya da dari biyu ne suka harbu da cutar amai da gudawa a jihar a cikin wata guda, musamman ma a karamar hukumar Ganjuwa da kuma fadar jihar.

Kuma kawo yanzu sama da mutum arba`in da bakwai ne suka rasu, yayin da ake ci gaba da jinyar wadanda ke harbuwa da cutar a sansanonin da aka kebe musu.