NDLEA ta kama daloli a Lagos

Hakkin mallakar hoto AFP

Hukumar hana sha da fataucin miyagun kwayoyi a Najeriya, NDLEA ta kama wani mutum dauke da sama da $2m a filin jiragen sama na Murtala Muhammad da ke a Lagos.

Wanda aka kama ya bayyanawa hukumar cewa zai kai kudaden ne Abuja domin a canza su.

Sai dai NDLEA ta ce an samu kudaden ne ta hanyar safarar hodar Iblis.

Hukumar ta ce mutumin ya bayyana mata cewa shi dan-canji ne.

'Yan Najeriya dai na fita da kudaden da ake zargin sun sata zuwa kasashen waje abin da ya sa aka tsananta bincike a kan iyakokin kasar.