Kotun Nigeria ta hana NLC yajin aiki

  • 17 Mayu 2016
Image caption Kungiyar kwadago ta NLC tana shirin fara yajin aiki ranar Laraba

Kotun sasanta 'yan kwadago a Najeriya ta dakatar da kungiyar kwadagon kasar daga tafiya yajin aikin da take shirin farawa ranar Laraba.

Ministan shari'a na kasar, Barista Abubakar Malami wanda ya tabbatarwa BBC hakan, ya ce kotun ta yi hakan ne domin hana fadawar kasar cikin halin ni-'ya-su.

Sai dai kuma ministan ya ce dakatarwar ta wucin-gadi ce kuma gwamnati na ci gaba da tattaunawa da kungiyar ta kwadago.

Kungiyar kwadagon dai ta ba wa gwamnatin Najeriya zuwa karfe 12 na daren Talata da ta janye karin farashin mai da ta yi daga N86 zuwa N145, ko kuma ta tafi yajin-aikin sai illa-Ma Sha-Allahu.