Ibrahimovic ya ci kwallo na 25,000 a tarihin Premier

Premier

Asalin hoton, Getty Images

Bayanan hoto,

Yadda Ibrahimovic ya yi murnar kwallon da ya ci ta 25,000 a gasar Premier

Zlatan Ibrahimovic ya ci kwallo na 25,000 a tarihin gasar Premier a ranar Lahadi, a wasan da Manchester United ta doke Swansea City 3-1.

Paul Pogba ne ya fara ci wa United kwallo kuma na 24,999, yayin da Ibrahimovic ya kara ta biyu a minti na 21 kuma ta 25,000 da aka ci a gasar ta Premier.

Haka kuma ta uku da Ibrahimovic ya ci wa United ita ce ta 400 da ya zura a raga tun lokacin da ya fara murza-leda a matsayin kwararren dan kwallo.

Wannan ne karon farko da United ta ci kwallon kirgen tarihi a gasar Premier, sai dai kuma ita ce aka fara ci a gasar Premier da aka fara a shekarar 1992.

Kuma Brian Deane ne ya zura wa United kwallo da ka a raga, a lokacin da suka fafata da Sheffield United a shekarar.