Crystal Palace ta kori Alan Pardew

Alan Pardew ya koma kungiyar ne daga New Castle United Hakkin mallakar hoto Getty Images
Image caption A watan Janairu na 2015 ne Alan Pardew ya koma Crystal Palace ha horar da tamaula

Crystal Palace ta kori kocinta Alan Pardew bayan kusan shekara biyu a kungiyar, inda yanzu take matsayi na 17 a teburin Premier.

A wasanni goma sha bakwai na gasar Premier da kungiyar ta yi a bana, an doke ta a goma, ta ci hudu, sannan ta yi canjaras a uku.

Sannan an zura mata kwallo 32 a raga yayin da ta jefa 28, kuma tana da maki 15 a wasannin bana.

Kungiyar ta dauki Pardew a kwantiragin shekara uku da rabi a watan Janairu na 2015, amma kuma ta kori kocin mai shekara 55 bayan nasara daya a wasanni 11.

Palace ta samu maki 26 ne kawai a wasannin Premier 36 da ta yi a shekarar 2016, kuma maki daya ne kawai tsakaninta da rukunin faduwa daga gasar a yanzu.

Masu lura da harkokin wasan kwallo kafa na ganin Sam Allardyce a matsayin wanda zai maye gurbinsa.

A sanarwara da ya bayar game da korar tasa, Pardew, ya ce, yana matukar kaunar kungiyar ta kwallon kafa, kuma yana takaicin yadda lokacinsa ya zo karshe a kungiyar.

A lokacin da yake wasa Pardew ya buga wa kungiyar wasanni sama da 100, tsakanin 1987 da 1991, kuma ya kai ta wasan karshe nma kofin kalubale na FA a bara.

Kawo yanzu kungiyar ba ta sanar da wanda zai jagorance ta ba a wasan Premier da za ta yi a gidan Watford ranar 26 ga watan Disamba.

Labarai masu alaka