Barca ta yi wasa 29 a jere a La Liga ba a doke ta ba

Barcelona Hakkin mallakar hoto AFP
Image caption Barcelona ta ci gaba da zama ta daya a kan teburin La Liga, kuma har yanzu ba a doke ta ba

Barcelona ta yi nasarar cin Athletic Bilbao 2-0 a Gasar Cin Kofin La Liga wasan mako na 29 da suka fafata a Nou Camp a ranar Lahadi.

Barcelona ta fara cin kwallo ta hannun Paco Alcacer a minti na takwas da fara tamaula, sannan Lionel Messi ya kara na biyu saura minti 15 a tafi hutu.

Da wannan sakamakon Barcelona ta buga karawa 29 a Gasar Cin Kofin La Liga ta shekarar nan ba a doke ta ba, inda ta ci wasa 23 ta yi canjaras a karawa shida.

Barca ta ci gaba da zama ta daya a kan teburi da maki 75, bayan da Atletico Madrid wadda ke da maki 64 ke ziyartar Villarreal.