Dalilan da za su hana Mbappe barin PSG

Kylian Mbappe Hakkin mallakar hoto Getty Images

Kylian Mbappe daya ne daga cikin fitattun 'yan wasan tamaula da kungiyoyi da dama za su so mallaka a kaka mai zuwa.

An dade ana ta rade-radin cewar Mbappe zai bar Paris St Germain. Shin ko dan wasan na tawagar Faransa zai koma wata kungiyar nan kusa domin murza-leda? Muhammed Abdu Mamman Skipper ya tattaro dalilan da za su iya hana dan wasan matsawa ko'ina.

Paris Saint-Germain ta shirya hanyoyin da za ta yi nasara a fagen kwallon kafa a nahiyar Turai musamman gasar cin kofin Zakarun Turai, inda ta gina kungiyar kan kokarin da Neymar da Mbappe za su yi mata.

Mbappe ya koma Parc des Princes a matsayin dan wasa mafi tsada bayan Neymar a tarihin tamaular duniya, kuma nan da nan ya zama tauraro a birnin Paris.

Ana kaunar yadda yake murza-leda domin yana da magoya baya da dama a ciki da wajen kasar, sannan ya taimaka wa tawagar kwallon kafar Faransa lashe kofin duniya da aka yi a Rasha a 2018.

Real Madrid ta fada karara cewa ba za ta yi zawarcin Mbappe ba idan an bude kasuwar saye da sayar da 'yan kwallon kafa ta Turai, yayin da a Paris ake hasashen ba na sayarwa ba ne.

Hatta a wajen filin wasa, PSG na bin duk wata hanya da za ta rike Mbappe, duk kuwa irin kudin da za a taya dan kwallon tare da abokin wasansa Neymar.

'Yan wasan biyu sun zama kamar David Beckham a Real Madrid a lokacin da ya taka leda a Spaniya, suna samar wa da kungiyar kudi da gasar Lique 1 da kasar Faransa baki daya.

Duk da cewar 'yan wasan na da matsaloli da buri a gabansu, amma kudin shiga da ake samu kan tallace-tallace da kuma karuwar sabbin 'yan wasa na kara wa gasar ta Faransa kudi da kima.

A baya-bayan nan PSG ta saka hannu kan kwantiragin tallar wani Otal Accor, wanda zai maye gurbin yarjejeniyar da suka kulla da Emirates a rigunan da 'yan wasa ke sakawa.

PSG za ta rika karbar Yuro miliyan 60 a kowacce kakar tamaula a sabuwar yarjejeniyar, kuma babbar yarjejeniya mai tsoka da aka taba yi a tarihin kwallon kafar Faransa.

Haka kuma kungiyar tana sa ran karin tallace -tallace da za su shigo mata a kaka mai zuwa ta dalilin zakakuran 'yan wasa kamar Mbappe.

Shugaban PSG, Nasser al Khalaifa ya tabbatar cewa Mbappe fitaccen dan wasa ne a fagen kwallon kafa a duniya, amma ba zai bari ya yi ragaita tsakanin gasar kasashen Turai ba.

Shi kansa Mbappe ya tabbatar wa da magoya baya cewa zai ci gaba da zama a PSG, kuma ba ya maganar makomarsa a kungiyar domin hankalin kowa ya kwanta a kansa.

Sai dai wasu ba za su yadda cewa Mbapppe ba zai bar PSG ba, domin dadi ba ya zaunar da dan kwallo a kungiya.

Duk da cewa dan wasan ya ce zai ci gaba da wasa a Paris, lokaci ne kawai zai tabbatar da hakan.

Labarai masu alaka