Rabon da Messi ya ci Real tun da Ronaldo ya koma Juve

  • Mohammed Abdu
  • BBC Hausa
Lionel Messi

Asalin hoton, Getty Images

Ranar Asabar za a yi karan batta a wasan hamayya wato El Clasico tsakanin Real Madrid da Barcelona da za su fafata a karawar mako na 30 a gasar La Liga.

Kawo yanzu kyaftin din Barcelona, Lionel Messi ya ci kwallo 23 a gasar La Liga, zai kuma so ya kara cin wasu a ragar Real Madrid a wasan da za su buga a Alfredo Di Stefano.

Dan wasan tawagar Argentina bai samu damar zura kwallo ba a ragar Real Madrid a wasan farko da suka buga a bana, inda Real ta ci 3-1 a cikin watan Oktoba a Camp Nou.

Rabon da Messi ya ci Real Madrid tun 2018 a kakar da Cristiano Ronaldo ya koma taka leda a Juventus, kuma wasa shida baya kyaftin din bai ko bayar da kwallo aka zura a ragar Real ba.

Wasan karshe da ya ci Real shi ne karawar La Liga fafatawar mako na 36 a shekarar 2017/18 da suka tashi 2-2 a Camp Nou.

Messi wanda a baya ke cin Real abokiyar hamayya, ya zura 21 a raga a fafatawa 27 - sai dai yanzu ya yi kasa inda ya ci biyar a wasa 17 baya da suka hadu.

Barcelona ce ta biyu a teburin La Liga da tazarar maki daya tsakaninta da Atletico ta daya, Real ce ta uku da tazarar maki biyu tsakaninta da kungiyar Camp Nou.

'Yan wasan da ke kan gaba a cin kwallaye a gasar La Liga:

  • Lionel MessiFC Barcelona23
  • Gerard MorenoVillarreal 19
  • Luis SuarezAtletico Madrid19
  • Karim BenzemaReal Madrid 18
  • Youseff En-NesyriSevilla 15
  • Rafa Mir Huesca 12
  • Alexander IsakReal Sociedad12
  • Jose Luis MoralesLevante 11
  • Roger MartiLevante 11
  • Mikel OyarzabalReal Sociedad10
  • Iago AspasCelta de Vigo10