Lunar Eclipse: Ihe onye amụmwa kwụrụ maka ọchịchịrị ikpuchi ọnwa

Ngwaọrụ gị akwadoghi ọkpụkpọ mgbasa ozi
Media captionIhe onye amụmwa kwụrụ maka 'Lunar Eclipse'

Otu ụkọchụkwụ a mara dịka 'Pastọ Abel' ekwuola na maka ọchịchịrị ikpuchi ọnwa bụ ihe ahịma, ihe nke mụọ nke Chukwu ma maka ya.

Pastọ Abel, onye nke kwuru nke a oge ya na onye ntaakụkọ BBC nwere mkparịtaụka kwuru na o nweghị nsogbu ọbụla maọbụ ọrịa ọ ga-ebute.

Ọ gara n'ihu kwuo na ụdị ya bụ ihe ahịma emebuola n'afọ 1947.

Ọkammụta Augustine Ubachukwu bụ onyeisi "Astronomy and Astrophysics Research Group" na mahadum Nsukka (UNN), kwuru na ọchịchịrị ga-ekpuchi ọnwa (ihe Bekee kpọrọ 'lunar eclipse') ruo otu elekere n'abalị taa.

N'akwụkwọ ozi Ubachukwu binyere aka, o kwuru sị "Ọchịchịrị ga-ekpuchi ọnwa na Naịjirịa na Fraịde, Julaị 27, ma ihuigwe dị mma. A ga-ahụ ya site mgbe ọ ga-eji ọkara gafee elekere itoolu ruo mgbe ọ ga-eji nkeji 20 gafee elekere 11.

"Ndị nọ na mpaghara "Eastern Hemisphere" nke mbaụwa nke bụ Yurop, Afrịka, Eshịa, Ọstralia nakwa Niu Ziland, ga-ahụkwa ya.

"Ọ ga-abụ nke kacha ogologo nke anya hụrụla n'ime narị afọ a (century) maka na ọ ga-anọzu otu elekere na nkeji 43. Ọ ga-eji ọchịchịrị na-ekpuchighị kpam kpam bido n'elekere 7:24pm, ebe nke ga-ekpuchi kpamkpam ga-ebido n'elekere 8:30pm ma bie n'elekere 10:13pm.

"Mkpuchi ọnwa nke kacha elu ga-eme n'elekere 9:22pm, mana nke na-ekpuchighị kpamkpam ga-ebi n'elekere 11:19 nke abalị."

Ubachukwu kwuru na ụfọdụ mpaghara Saụt Amerịka ga-ahụ ebe ngwụcha mkpuchi ọnwa a ma anwụ daa taa, ebe ndị Niu Ziland ga-ahụ mbido mkpuchi ọnwa tupu anwụ amalite echi.

Nkenke aha onyonyo Ọchịchịrị a ga-eme makana ọnwa ga-anọchi ụzọ anwụ si ahụ ọnwa

O kwukwara na ọchịchịrị ikpuchi ọnwa na-eme naanị ụbọchị ọnwa juru eju, ma kwuo na kama ikpuchi anya etu e si eme ma ọ bụrụ mgbe anwụ kpuchiri ọnwa, na a ga-elenwu nke a anya na-enweghị ihe mmerụ ahụ ọbụla.

O kwukwara na mkpuchi ọnwa ọzọ a ga-ahụ anya na Naịjirịa ga-eme n'ụbọchị 21 nke ọnwa Jenụwarị nke 2019.

Akụkọ ndị ga-amasị gị:

Isiokwu Ndị Emetụtara

Ihe ndị ọzọ n'akụkọ a