Kedụ ihe i hụrụ na nrọ n'abalị pụtara?

Onye nọ n'ụra Image copyright Getty Images
Nkenke aha onyonyo Nro nwere ọrụ abụọ ọ na-arụ na ndụ mmadụ

Ọtụtụ oge, ọ na-abụ mmadụ raghụcha ụra teta, onye agbataobi ya maọbụ nwaane ya ajụọ ya ihe ọ hụrụ na nrọ.

Nrọ bụ otu ihe so na ndụ mmadụ, ụfọdụ oge, onye rahụcha ụra ma ọ rọghị nrọ, ọ dị ya ka ụra ya ezughi ezu.

Mana ebe ụfọdụ na-eche na nrọ enweghi ihe ọ bụ, ndị ụfọdụ che na nrọ na-egosi ihe na-eme maọbụ ihe ga-eme na ndụ onye rọrọ ya.

Ngwaọrụ gị akwadoghi ọkpụkpọ mgbasa ozi
Media captionAchọrọ m ịgụ egwu n'eluigwe - nwaanyị na-agụ egwú n'ahia

Nke a kpatara na ọtụtụ oge, onye rọchaa nrọ, ọ chọwa nkọwa ya ma chọwa ihe ọ ga-eme ma ọbụrụ na ọbụghị ezi nrọ.

E nwere nrọ ndị bụ ezi nrọ na ndị bụ ajọ nrọ, ihe na-akpata nke bụ nke bụ nkọwa e nyere ya.

Mana gịnị ka ụfọdụ nrọ mmadụ na-arọ pụtara?

1. Mmọnwụ na-achụ gị ọsọ

Ị nọ na nrọ na-agba ọsọ mmọnwụ maọbụ ihe na-atụ gị ụjọ a na-achụ gị ọsọ, ị na-achọ ịgbanarị ya ma na ọ dịka a kujiri gị ụkwụ. A na-akọwa na ụdị nrọ a na-egosi ihe ndị ị na-atụ ụjọ na ndụ gị maọbụ ihe ndị na-echere gị aka mgba. Ihe ndị nwereike ịbụ mmadụ ibe gị maọbụ gị onwe gị, i kwesiri isi ike guzosie ike ka gị na onye na-achụ gị kwata ya na nrọ ahụ ka ọ hapụ gị. Ụnụ lụọ ọgụ, ọ bụrụ na i tigbughi ya, ọ ga-etigbu gị mana e kwuru na ọ ka mma ma i tigbuo ya.

Image copyright Getty Images

Mana iji ghọta ụdị nrọ a, jụọ onwe gị ụdị ihe ndị ị na-atụ ụjọ na ndụ gị maọbụ ihe ndị na-echere gị aka mgba, ka i nwee ike guzoro n'ụkwụ gị nweta ume hazie ọnọdụ ndị ahụ ka i nwere onwe gị. Dịka onye dọkịnta na-ahụ maka akọnauche bụ Chimezie Elekwachi Lekwa siri kwuo, ụdị nrọ a nwereike igosi ihe na-atụ mmadụ ụjọ nke ọ na-achọghị itinye echiche na ya.

2. I chọtara akpa ego maọbụ ihe ndị na-ada oke ego na nrọ

Nke a nwereike ịpụta ụfọdụ ihe dị icheiche.

Image copyright Getty Images

a. I ji mmadụ ụgwọ na-enye gị nsogbu, ị na-achọ ụzọ i ga-eji kwụọ ụgwọ ahụ, ị hụ ebe i nwetara ego ịkwụ ya bụ ụgwọ na nrọ.

b. Egwu na-atụ gị na ihe i nwere nwereike nọkata ọ gaghị adịzi. Ụdị ụjọ a nwereike ime gị ịrọ ụdị nrọ iji kasie onwe gị obi na onweghi ihe na-eme.

c. Ụjọ na ihe i nwere agaghị ezuru gị. Nke a nwereike ime gị ị na-achụ ego n'ike n'ike churuo ya na nrọ.

Mana nsogbu na-adị bụ na n'ime ụdị nrọ a, ezigbo ụjọ na-esokwa ya mana ọ bụ ihe mmadụ ga-ajụ onwe ya,'onye nyere m ego ahụ, gịnị ka onye ahụ pụtara m? Kedụ ebe m nọ nweta ya bụ ego na nrọ ahụ? Gịnị ka m mere oge m hụrụ ya bụ ego, ọ bụ nke anya ukwu ka ọ bụ echiche?

Image copyright Getty Images

3. Itufu agba ego maọbụ igodo gị na nrọ

Mmadụ itufu ntụpe maọbụ igodo na nrọ nwereike ịpụta na onye ahụ na-etufu ikike o nwere n'ihe dị ya oke mkpa.

4. Ịrọ nrọ na ị nọ ebe ị na-amaghị

Nke a nwereike igosi na ị na-achọ ifu ụzọ n'ihe ị na-eme maọbụ na mmadụ na-achọ ịghọrị gị.

Image copyright Getty Images

Ọrụ nrọ na-arụ na ndụ mmadụ

BBC Igbo na dibia na-ahụ maka akọnauche bụ Chimezie Elekwachi Lekwas kpara nkata gbasara nrọ, ebe ọ kọwara na nrọ na-arụ ụzọ ọrụ abụọ na ndụ mmadụ.

O kwuru na mbụ, nrọ na-egosikarị ihe na-eme mmadụ ọ na-achọghị itinye uche na ya.

Ya bụ na mmadụ na-ahụ ụfọdụ ihe na nrọ, o kwesiri inyocha ime onwe ya hụ na ihe ahụ ọ na-ahụ abụghị ihe ọ na-agba nkịtị.

Nke abụọ, Lekwas kwuru na nrọ na-abụkwa ihe mere mmadụ maọbụ na-achọ ime mmadụ nke onye ahụ ma kama na ọ na-ekpuchi ya n'ike n'ike.

Ya bụ mmadụ nwereike ịgabiga ihe dị oke egwu nke ọ na-achọghị icheta, o mechaa, ihe ahụ a na-achụ ya na nrọ.

Akụkọ ndị ga-amasị gị:

Isiokwu Ndị Emetụtara