Sexual assault: Ndị omekome kwasoro nwaagbọghọ iko ma gbuo ya

Juliet Eze
Nkenke aha onyonyo Juliet Eze Nne nwaagboghọ ahụ egburu

Iru uju na ibe akwa jupụtara n'ezinaụlọ Ngozi Eze, bụ onye ahụrụ ozu ya n'akụkụ ụlọakwụkwọ Community Sekọndịrị Imufu n'Enugwu Ezike ebe ọ gara ịmụ akwụkwọ ule Jamb.

Nne nwabọghọ ahụ Juliet Eze, kwuru na obi agbawaala ya n'ihi na o doro ya anya na nwa ya gabigara ihe oke ihe ụfụ n'aka ụmụokroọbiịa ahụ tupu ha e gbuo ya.

O kwuru na ọnwụ nwa ya dịka ọ bụ ya na nrọ.

Dịka nna nwata a egburu bụ Jonathan Eze gwara BBC, na nwa ya nwaanyị si Abuja ebe ya na nne ya bi lọta.

O kwuru na ọ na-ebu ya n'ụgbọ ọgbatutum aga ebe ọ na-akwado maka ule Jamb.

Nkenke aha onyonyo Jonathan Eze Nna Ngozi

Eze ji anya mmiri kwuo na ọdachị a mere na mbido izu ụka a mgbe ọ gara ibulata nwa ka o mechara ọmụmụihe na mgbede mana ọhụghị ya.

O kwuru na ọ malitere chọwa nwa ya rue ime abalị tupu ọ gwa ndị ụmụnna ya na igwe obodo na nwa ya na-efu efu.

Ọ bụ n'ụtụtụ ụbọchị Wenezde ka ndị mmadụ hụrụ ozu nwa ya n'akụkụ ụlọakwụkwọ dị n'Imufu ebe ahụ.

Osote onyeisi ụlọakwụkwọ Community Sekọndịrị Imufu, bụ Benedict Eke kwuru na ọ bụghị n'ụlọ akwụkwọ ka egburu nwaagbọ, kama na ahụrụ ozu ya n'akụkụ ụlọakwụkwọ ahụ.

Nkenke aha onyonyo Ahụrụ ozu Ngozi na akụkụ ụlọakwụkwọ a

Igwe ndị Imufu bụ Igwe Remigus Attah kwuru na ịma nwaanyị elu n'ike ma gbuo ya bụ ụdị arụ na-emebeghi mbụ n'ala ha ma kwuo na ọ bụ ihe ịgbagwoju anya na mmadụ katara obị kpaa ụdị arụ a.

Onye isi ndị nche n'Imufu bụ Augustine Okechukwu nakwa ndị ọnụ na-eru n'okwu kwere nkwa na oge na-adịghị anya na aka ga-akpara ndị gburu Ngozi Charity Eze n'ihi na ha agbala ọnya ka anwụdo ha.

Akụkọ ndị ga-amasị gị: