NAF denial: A maghị ihe ụgbọelu ndịagha bịara ime n'obodo anyị - Ndị Akwụke

Ụgbọelu ndịagha Image copyright NAF

N'izuụka gara akụkọ kwuru na ndịagha ụgbọelu ji helịkọpta ebunye ndị ọchị ngwa ọgụ n'Akwuke dị n'Enugwu Steeti.

Ndịagha ụgbọelu site n'ọnụ na-ekwuru ha bụ Faith Aigbeoghain sị na nke a bụ ezigbo asị.

N'ihi ọtụtụ okwu nke a buterela na soshal midia, mere BBC Igbo ji jụọ ụfọdụ ndị obodo Akwụke ị mata nke bụ eziokwu.

Otu onye obodo Akwuke aha ya bụ Gabriel Ogbodo kwuru na ọ bụ eziokwu na ụgbọelu helikọpta nọ na-efeda n'Akwuke.

Mana ọ maghị ma onwere ndị ha na-ebunye ngwa ọgụ n'ebe ahụ dịka ha na-efedata, na ọ bụ n'ịntanet ka ọ nụrụ ya.

Ngwaọrụ gị akwadoghi ọkpụkpọ mgbasa ozi
Media captionAkwuke na ndị na achị ehi na-ebi n’udo

Ogbodo kwuru na ụgbọelu helikọpta na-efedata n'ebe ahụ n'oge mbụ na nke a abụghị mbụ ọ na-eme n'obodo ha.

Eze Akwuke Uwani bụ Igwe Cyprian Ekwomchi kwuru na ọ nụrụ maka nke a mana o nweghi ihe ọ ga-ekwu banyere ya, kama ka a jụọ Igwe Akwuke nke ọzọ.

Mana Eze Akwuke nke ọzọ bụ Igwe Benard Nsude Nwoye kwuru na mgbe ọ nụrụ akụkọ a, na o zipụrụ ozi, iji chọpụta ma ọ bụ eziokwu.

N'okwu ya "Onye m zipụrụ ebe ahụ sị na ụgbọelu nwere agwa ndịagha fegharịcha na o fepụkwa."

O kwuru na ndị nọ n'ebe ahụ gwara ndị uweojii na o nweghi ngwaagha ọbụla ha hụrụ a na-ebubata. Mana na ndị uweojii ka na-eme nyocha banyere ya.

Igwe Nwoye sị na ọ kpọrọ onyeisi ndị Fulani n'Akwuke ka ọ maara ma o nwere kepukepu ọ nụrụ mana a sị na ọ na-arịa ọrịa.

Ọ gara n'ihu kwuo na ndị obodo Akwuke na ndị Fulani nọ gburugburu ha bi n'udo kamgbe ọtụtụ afọ.

Akụkọ ndị ga-amasị gị: