Natural Resources: Imo State na ihe akụ ọnatarachi juputara n'ime ya

  • Chukwunaeme Obiejesi
  • Broadcast Journalist, Igbo
Mmiri Oguta dị n'Imo steeti

Imo steeti so na steeti na-emepụta mmanụ agbịdị na Naịjirịa.

Ụmị mmanụ agbịdị dị n'Imo steeti karịrị otu narị na iri isii.

Ụmị ndị dị n'obodo iri na abụọ na steeti ahụ

Mana ọ bụghị naanị mmanụ agbidi bụ ihe akụ ọnatarachi dị na steeti ahụ.

Lee ndị ọzọ ebe a dịka nchọpụta ngalaba 'Raw Materials Research & Development Council' si kwuo.

1) Zinc

Ebe foto si, www.worldatlas.com

Nkọwa foto,

Zinc

Zinc bụ ụdị igwe e si n'ala egwupụta.

Chaịna, Peru nakwa Ọstrelia bụ mba ndị e ji mmepụta 'zinc' mara.

Ọ na-enye aka na mmepụta ọkụ latrik.

A gwakọọ 'zinc' na 'copper', e nweta 'brass'.

E nwekwara 'zinc' nke na-edozi ahụ.

Ihe ndị ọọ e ji 'zinc' emepụta bụ rọba, mmanụ e ji ete ụlọ (paint), na kemịkalụ ụfọdụ.

Na mpaghara ụfọdụ n'Okigwe na Orlu ka e nwere 'zinc' n'uju.

2) Gypsum

Ebe foto si, Getty Images

Nkọwa foto,

Gypsum

Gypsum bụ ụdị nkume e si n'ala egwupụta.

Ihe e ji ya arụpụta gụnyere nzu bekee a kpọrọ 'chalk', ọgwụ, nakwa 'Plaster of Paris' (POP).

E jikwa ya eme ka ala kawanye mma iji kọọ ihe.

Ebe ị ga-ahụ 'Gypsum' bụ n'Okigwe.

3) Lead

Ebe foto si, Getty Images

Nkọwa foto,

E ji 'lead' arụpụta batịrị

Otu ihe kacha mkpa e ji 'lead' emepụta bụ 'battery'.

'Battery' bụ ihe na-enye ụgbọala, ọgbatumtum, ekwentị na ihe ndị ọzọ ike.

E jikwa lead emepụta igwe na ihe ndị ọzọ.

Okigwe na Orlu nwere 'lead' n'uju.

4) Limestone

Ebe foto si, Getty Images

Nkọwa foto,

Igwe e ji akwọri 'limestone'

Ihe e ji 'limestone' arụpụta buru ibu.

Ha gụnyere 'cement', 'ceramics' na ihe ndị ọzọ.

'Limestone' na-aka mfe igwupụta karịa nkume ndị ọzọ. Ebe e nwere ya n'Imo Steeti bụ na mpaghara Ohaji-Egbema na Okigwe.

5) Kaolin

Ebe foto si, Getty Images

Nkọwa foto,

'Kaolin'

'Kaolin' bụ ụdị nkume ọcha na-akwọ mụrụmụụ.

E ji ya emepụta nke Bekee kpọrọ 'ceramics', werekwa ya arụ ọgwụ na-akwụsị otoro maọbụ afọ ọsịsa.

Kaolin dị n'Ehime Mbanọ, Isu nakwa Oru North.

6) Lignite

Ebe foto si, AFP

Nkọwa foto,

'Lignite' na-enye igwe na-emepụta ọkụ latrik ike

Lignite bụ ụdị 'coal'.

Mana ọnaghị eji uji nke ukwu dịka 'coal' ndị ọzọ.

A naghị ejikarị 'lignite' akwọ ụgbọ oloko (train).

Ebe ọ na-aka egbo mkpa bụ na mmepụta ọkụ latrik.

'Lignite' dị n'akụkụ ụfọdụ n'Orlu'.

7) Bentonite Clay

Ebe foto si, Getty Images

Nkọwa foto,

Aja ụrọ 'bentonite'

Na mpaghara Ideato South nakwa Isu ka e nwere 'bentonite'.

Nke a bụ ụdị aja ụrọ na acha ọcha.

Ọ na-enye aka n'igwu ụmị dị icheiche dịka ụmị mmiri nke Bkee kpọrọ 'Borehole'.

Ọrụ ya bụ igbochi mmiri ịba ebe achọghị ka ọ baa.

8) Ndị ọzọ

Ebe foto si, Twitter/EmekaIhedioha

Nkọwa foto,

Gọvanọ Imo Steeti, Emeka Ihedioha, gara ilegharị anya n'Oguta 'Lake'

Obodo dị icheiche n'Imo Steeti nwere ọtụtụ emume ọdịnala mara mma nke ukwu.

Ọ bụrụ na e lebaa emume ndị anya ma mezie ya nke ọma, ọ ga-adọta ndị mmadụ ka ha na-abịa njem nlereanya na steeti ahụ.

Bịa tinyekwara oshimiri Ugwuta nke a na-akpọ 'Oguta Lake' na Bekee.

Ụdị ihe a bụ ihe na-amasị ndị njem nke ukwu.

Imo bụkwa steeti ala ya na-emepụta nri nke ọma.

Naanị nkọpụta nri, ma e mezie ya ọfụma, nwere ike inye gọọmentị Imo nnukwu ego.

Akụkọ ndị ọzọ ga-amasị gị:

Ihe nkiri ga-amasị gị:

Aha onyonyo,

'Dick Tiger tinyere ego ọ kụtara n'ọkpọ na nkwado agha Biafra' - Chijoke Ihetu