Operation Positive Identification: Gịnị bụ atụmatụ a ndịagha Naịjirịa chọrọ imalite?

Onyeagha na-enyocha ndị nọ n'elu ọgbatumtum Image copyright Getty Images
Nkenke aha onyonyo Onyeagha na-enyocha ndị nọ n'elu ọgbatumtum

Ihe na-ewu na soshal midia bụ atụmatụ 'Operation Positive Identification' (OPI) nke ndịagha Naịjirịa kwuru na ha ga-amalite.

Ọtụtụ kwuru na atụmatụ ahụ bụ ụzọ ndịagha si emekpa ụmụ mmadụ ahụ.

Mana otu ihe doro anya bụ na ọtụtụ amachaghị maka ya bụ atụmatụ.

Gịnị bụ 'OPI'?

Image copyright Twitter/HQNigerianArmy

Ọ bụ n'abalị iri abụọ na abụọ nke ọnwa Sepụtemba ka ndịagha kwuru na ha amalitela 'Operation Positive Identification'.

N'oge ahụ, ha kwuru na nke a ga-abụ naanị na mpaghara ugwu ebe ndị oyiegwu Boko Haram na-enye nzogbu.

Ha kọwara na atụmatụ ahụ bụ iji chọpụta ma nwụchie ndị otu Boko Haram na-ezo ezo.

Ha dọkwara aka na ntị ka onye ọbụla bi maọbụ na-eme njem na mpaghara Nọt-Ist jiri akwụkwọ njirimaraonye nke Bekee kpọrọ 'Identity Card' kpagharịwa.

'OPI' ọ ga-agazu Naịjirịa niile?

Image copyright Twitter/HQNigerianArmy

Ndịagha kwuru na atụmatụ 'OPI' ga-agazu Naịjirịa niile.

Ha mara ọkwa a n'akara 'Twitter' ha n'abali iri abụọ na ise nke ọnwa Sepụtemba.

Ụfọdụ ndị mmadụ malitere kesawa ozi ha sị na o si n'aka ndịagha.

Ozi ahụ na-ekwu na 'OPI' ga-agazu Naịjirịa niile.

Image copyright Nigeria Army
Nkenke aha onyonyo Ndịagha Naịjirịa kwuru na akụkọ gbasara 'OPI' abụghị eziokwu.

Ozi ahụ kwukwara na atụmatụ ahụ ga-amalite n'abalị mbụ nke Nọvemba ruo abalị iri abụọ na atọ nke Disemba.

Mana ọnụ na-ekwuru ndịagha bụ Sagir Musa, gwara BBC na ozi ahụ bụ ụgha.

Ndị omeiwu gbarụrụ ihu maka ya?

Image copyright Twitter/HouseNGR
Nkenke aha onyonyo Onyeisi ụlọomeiwu nta, Femi Gbajabiamila

Ndị ụlọomeiwu nta kpọkuru onyeisiala Muhammadu Buhari ka o gbochie ndịagha imalite atụmatụ a.

N'ọgbakọ ha nwere n'ụbọchị Tuuzde, ụbọchị 29 nke ọnwa Ọktoba 2019, ha kwuru na atụmatụ 'OPI' megidere iwu Naịjirịa.

Ha kwuru na inyocha akwụkwọ njirimara ndị mmadụ abụghị ọrụ dịịrị ndịagha.

Ndị kwadoro okwu ahụ bụ Ndudi Elumelu na Ahmadu Jaha.

Ihe ndị mmadụ na-ekwu na soshal midia

Ọtụtụ ndị mmadụ akwadoghi atụmatụ 'Operation Positive Identification'.

@segalink kwuru na atụmatụ ahụ adabaghị chaa chaa.

@adeyanjudeji kwuru na atụmatụ ahụ bụ maka ntuliaka a na-achọ ime na Kogi nakwa Bayelsa steeti.

@AyoBankole kwuru na ndịagha na-achọ iweghara ebe niile na Naịjirịa.

Akụkọ ndị ọzọ ga-amasị gị:

Ihe nkiri ga-amasị gị:

Ngwaọrụ gị akwadoghi ọkpụkpọ mgbasa ozi
Media caption"Ego dị n'ịzụ ọkụkọ Bekee"