Discrimination: Ị ma na ị nwereike ịkpa oke na-amaghị ama?

Ụmụ nwanyị abụọ makọrọ onwe ha

Ebe foto si, Getty Images

Ịkpa oke bụ ihe ọtụtụ mmadụ na-akagbu ma sị na ọ jọgburu udele ma sigbuo nkapị.

Mana, ị ma na ọtụtụ mgbe ndị mmadụ na-akpa oke dị icheiche na-amaghị ama.

Nke a na-akacha emebi ihe n'ihi na onye na-akpa ya bụ oke amaghị maọbụ ekweteghị na ọ na-akpa oke.

Otu ihe dị mkpa ka ị mata bụ na ịkpa oke dị iche iche.

Lee ụzọ ị nwereike isi na-akpa oke na-amaghị ama:

1: Ịma mmadụ maọbụ 'Nepotism' na Bekee

Ebe foto si, Getty Images

Nkọwa foto,

Ị ga-enye enyi gị ọrụ ma ọ bụrụ na ọmaghị ya bụ ọrụ?

'Nepotism' pụtara mgbe onye nọ n'ọkwa ji ike ya wee nye nwanne ya ma ọ bụ enyi ya ọrụ ma ọ bụ ihe nrite ndị ọzọ nanị maka na ọ ma onye ọ bụ.

Ị nwere ike sị na ọnweghị ihe ọ mere mana chetakwa na onye kwesiri ka enye ya ọrụ ahụ nọzị nkịtị.

Ụzọ kacha mma i ji kwụsị 'nepotism' bụ ịhụ na onye ọbụla nwetara ihe ruuru ya, na-agbanyeghi onye ọ ma maọbụ ebe o si.

2: Enwetaghị ntaramahụhụ nke Bekee na-akpọ 'Impunity'

Ebe foto si, Getty Images

Nkọwa foto,

Ndị nọ na nga

Ụfọdụ mgbe ihunaanya anaghị ekwe ndị mmadụ inye ndị mmadụ nataramahụhụ ruru ha.

Nke a ka a na-akpọ "Impunity" n'asụsụ bekee ebe ị nwere ike ịkpọ ya "enwetaghị ntaramahuhu" n'okwu igbo.

Ụdị ihe a na-adịkarị ire n'ezinụlọ ebe nne ma ọ bụ nna anaghị ekwe ata ụmụ ha ahụhụ mgbe ha mere ihe ọjọọ maka na ha hụrụ ha n'anya.

I ji gbochie ya, gbaa mbọ na-erube isi n'ihe iwu kwuru.

Cheta na dịka ọchịchi na iwu obodo sịrị dị, ọ bụ iwu obodo kachasị di mkpa karịa ofufe dị iche iche.

Nke a pụtara na otu ọ bụla osiri dị, ị ga-ajụ onwe gị, " Gini ka iwu obodo kwuru maka nke a".

3: kpa oke agbụrụ nke Bekee na-akpọ 'Racism'

Ebe foto si, Getty Images

Nkọwa foto,

Sterling nke Manchester City yị mgba aka edere "Respect" ị jị megide ịkpaoke agbụrụ

Nke a bụ nsogbu so wee kpata agha mba ụwa nke abụọ bụ nke a kpọrọ 'World War Two' na Bekee.

Ọ bụkwa ya butere nsogbu na mba Saụt Afrịka ọtụtụ afọ gara aga bụ nke a kpọrọ 'Apartheid'.

Mana ruo taa, ịkpa oke agbụrụ ka na-enyekwa nsogbu n'akụkụ ụwa niile.

Bido na mba Amerịka ruo Rọshịa, gaa Jamanị, bata Briten ọtụtụ ka na-akpa oke agbụrụ.

Ikpa oke agbụrụ bụ nkwenye na otu agbụrụ ka nke ọzọ mma n'ụzọ ọbụla.

Mana nke a abụghị eziokwu n'ihi na mmadụ niile bụ otu ma ndị ojii ma ndị ọcha.

4: kpa oke obodo (Tribalism)

Ikpa ọke obodo bụ mgbe mmadụ kwenyere na obodo ya ka obodo ndị ọzọ mma.

Ọtụtụ ekwuola na nke a sọ na otu ihe na-enye obodo Naijirịa nsogbu.

Oge ntụlịaka na Naijirịa, otụtụ mmadụ na-atụnyere onye nke ha maka na ha si otu obodo.

Ọtụtụ ndị mmadụ ji maka ihe ha nụrụ maka obodo ndị ọzọ were too.

Ọ dị mkpa ka mmadụ niile mara ma nabata obodo ndị ọzọ na asụsụ nakwa omenala ha, ma kuzikwaara ụmụ ha ime otu a.

5: kpa oke ndị ọba nke Bekee na-akpọ 'Xenophobia'

Ebe foto si, Getty Images

Nkọwa foto,

Ndị oke agbụrụ ọbia metụtara na Saut Afrịka

Ebe nke a kacha pụta ihe nsonso a bụ na mba Saut Afrịka dịka ha sị ndị mbiarambia ka ha sị obodo ha pụọ.

Ọ bụrụ na iwe na-ewe gị maka ndị ọbịa bi na obodo gị, lezie kwa anya na ị nwere ike ị na-akpa oke ndị ọbịa.

Ihe nke a gosiri bụ na onwe gị ejughị gi afọ nke mere na ị kwenyere na ọ bụ ndị mbiarambia mere na ịtozughị etu ị kwesịrị.

Ọ dị mkpa ka ịghọta na-enweghị onye gị na ya na-azọ obodo ma kwere na ị gbaa mbọ na ị ga-enwetakwa nke gị.