Chacha Eke Bipolar disorder: Gịnị ka ọ pụtara, gịnị bụ njirimara ya, kedụ etu e si agwọ ya?

Cha Cha Eke

Ebe foto si, chachaekefaani/Instagram

Nkọwa foto,

Chacha Eke pụtara n'ihe onyonye kwuo na ọ na-arịa ọrịa ụbụrụ a kpọrọ bipolar disorder.

Onye a ma ama n'ime ihe nkiri bụ Chacha Eke pụtara n'ihe onyonyo kwuo na ọ na-arịa ọrịa ụbụrụ a kpọrọ bipolar disorder.

Ọ sị na ọ bụ ọrịa a mere o ji pụta n'ihe onyonyo n'izuụka gara aga (ụbọchị atọ nke ọnwa Ọktoba, 2020) ma bo di ye ebubo iti ya ihe.

Mana nwanne ya nwoke apụtala sị na nke a bụ asị na Chacha anaghị arịa ọrịa bipolar disorder.

Nke a mere anyị ji atụle ihe ọrịa pụtara na njirimara ya.

Gịnị bụ 'bipolar disorder'?

Ebe foto si, Science Photo Library

Nyocha ngalaba ahụike mba UK a kpọrọ 'National Health Scheme' (NHS) nyere nkọwa banyere 'bipolar disorder'.

'Bipolar disorder' bụ ọrịa na-emetụta ụbụrụ nke nwereike ịgbanwe ọnọdụ mmadụ, ọnọdụ a nwereike igbanwe site n'ogogo otu ruo nke ọzọ n'otu ntabi anya.

Onye na-arịa ọrịa ụbụrụ a nwereike inwe nnukwu obi aṅụrị n'otu mgbe nke nwereike igbanwe ma bụrụ ọnọdụ nwute.

Njirimara 'Bipolar disorder'

Ndị na-arịa ọrịa ụbụrụ a na-ahụta ihe ndị di etu a:

  • Ịda mba - Inwe mwute, ịdị ala na ịdị ka ọ bụ i kwesighi ekwesi
  • Inwe akparamagwa dị aṅaa - Imebiga ihe oke, ikike, obi ụtọ

Onye na-arịa 'bipolar disorder' nwereike inwe mgbanwe ọnọdụ n'ime ọtụtụ izuụka.

Ịda mba

Ebe foto si, Getty Images

Nkọwa foto,

'Bipolar disorder' nwereike iweta echiche igbu onwe

Mgbe onye ahụ na-enwe obi ịda mba, njirimara ya gụnyere:

  • Ọ ga na-enwe mwute, ka olileanya ọ gwụla, obere ihe ga na-agbakasị ya ahụ.
  • Ike ga na-agwụ ya.
  • Uche ya agaghị ezu oke, ọ ga na-enwe oke nchefu.
  • O nweghi ihe ga na-amasị ya ime.
  • Agụụ agaghị na-agụ ya.
  • Ọ ga na-eme ka onye na-ezughi oke.
  • Ọ ga-ara ya ahụ ihi ụra.
  • Ọ ga na-eteta ụra ọsịsọ.
  • Echiche igbu onwe ya.
  • Ọ ga na-enwe ikpe ọmụma n'obi.
  • Inwe obi abụọ.

Akparamagwa dị aṅaa

  • Inwe oke obi ụtọ, aṅụrị karịrị oke
  • Ọ ga na-ewe iwe ọsịsọ na ikwupu okwu ọsịsọ
  • Ikike dị elu
  • Onwe ya ịdị ya oke mkpa
  • Inwe nnukwu echiche ọhụrụ na atụmatụ dị mkpa
  • Ịkpọpụ uche ya ngwa ngwa
  • Inwe iwe na mgbakasị ahụ ngwa ngwa
  • Ịmụ anya arọ nrọ, na iche echiche na-enweghi isi
  • Enweghi mmasị ihi ụra
  • Erighi nri
  • Ị na-emefu ego n'ihe na-abaghị uru na nke aka ya na-erughi
  • Ị na-eme mkpebi maọbụ na-ekwu ihe ndị nwereike itinye ya na nsogbu

Ebe foto si, Getty Images

Nkọwa foto,

Ọgwụ e ji agwọ bipolar disorder

Bipolar disorder bụ ọnọdụ nwereike ịrị elu n'ogogoe kachasị. Onye na-arịa ọrịa a nwereike ọ gaghị ama mgbe o nwere oke obi ụtọ maọbụ obi ịda mba.

Ọ bụrụ ha lọghachite n'onodu dị mma ọ ga-eju ha anya ụdị agwa ha kpara. O nwere ndị ọ na-eme karịa ibe ha. Ụfọdụ ndị ga na-ahụ, anụ isi maọbụ ụda ihe ndị na-adịghị ebe ahụ.

Gịnị na-ebute ọrịa 'bipolar disorder'?

O nweghi onye ma kpọmkwem ihe na-ebute ya kama ọtụtụ ihe nwereike ịkpali ya.

  • Oke ndọga ahụ na nchegbu
  • Oke nsogbu
  • Mburu pụta ụwa na mmiri ndụ
  • Ihe omume na-agbanwe ndụ

Onye nwereike ịrịa ọrịa a?

Ọrịa ụbụrụ a bụ 'Bipolar disorder' na-emekarị ndị otu onye n'ime mmadụ narị.

O nwereike ime onye nọ n'ogogo afọ ọbụla, na-agbanyeghi na ọ na-amalitekarị n'etiti afọ 15 na 19. Onye gaferela afọ 40 nwereike ọ gaghị ebutezi ya.

Ọrịa ụbụrụ a nwereike ime nwoke maọbụ nwaanyị. O nwereike ime onye ọbụla.

Ebe foto si, Getty Images

Nkọwa foto,

Lithium bụ ọgwụ mbụ e ji gwọ 'bipolar disorder' mana nchọpụta gosiri na a na-enya ya mmadụ otu n'ime iri abụọ

Ụzọ ndị e ji agwọ ya gụnyere:

Ọ bụ dọkịta ụbụrụ isi bụ 'psychiatrist' nwereike ikwu ma mmadụ o nwere ọrịa bipolar disorder, o nweghi ọgwụgwụ mana e nwereike iji ọgwụ achịkwa ya.

  • Ọgwụ ndị na-agwọ ịda mba na akparamagwa dị aṅaa.
  • Mata ihe na-ebute mgbanwe ọnọdụ a ma gbara ha ọsọ.
  • E nwere ọgwụ ndị dọkịta nwereike ịsị ka e were kwụsị ọrịa a.
  • Ọgwụgwọ nke uche - Ị ga aga hụ onye ọkachamara ga-enyere gị aka ịgbanahụ ịda mba ma dụọ gị ọdụ maka mmekọrịta gị na ndị mmadụ.
  • Ndụmọdụ etu e si ebi ndụ - Imega ahụ kwa mgbe, mee ihe ndị ga-enye gị obi ụtọ, rie nri ọfụma ma hie ụra ọfụma.

Ọgwụ mgbochi bipolar disorder

  • Lithium
  • Ọgwụ Anticonvilsant
  • Ọgwụ Antipsychotic

Akụkọ ndị ọzọ ga-amasị gị: