Илим Карыпбеков: Би-Би-Синин жаңылыктары КТРКнын алдыңкы он программасына кирет

Би-Би-Си ТВ жаңылыктары 15 мүнөткө узарды, эми эл аралык жаңылыктарга технология, маданият, ден-соолук темасындагы жана региондогу кабарлар, ошондой эле жаштарга арналган берүүлөр кошулат.

Бул окуя жалпы көрүүчүлөрү үчүн кандай мааниге ээ экенине Коомдук теле-радио корпорациясынын баш директору Илим Карыпбеков токтолду.

Image caption КТРКнын баш директору Илим Карыпбеков Бишкектеги Би-Би-Си студиясында

И.Карыпбеков: Беш мүнөт деп айтыш оңой, бирок бул аябай чоң нерсе. Ошол беш мүнөттүк жаңылыктарды жасаш үчүн чоң эмгек талап кылынат. Биз эл аралык жаңылыктар жөнүндө айтып жатабыз да. Аны жасаш үчүн көп убакыт, көп каражат, адамдык ресурс дагы, техникалык жабдык да керек. Мунун баарын эске алсак, албетте бул чоң жетишкендик. Бул тууралуу мен КТРК менен Би-Би-Си Кыргыз кызматынын үзүрлүү кызматташтыгы деп айта кетсем болот.

Би-Би-Си жалаң гана эл аралык жаңылыктарды нукура кыргызча, сапаттуу кылып чыгарбастан, анын башка да мааниси бар. Би-Би-Си Кыргызстанда журналисттик этиканы сактоодо эл аралык деңгээлдеги жогорку көрсөткүч болуп саналат. Бир гана жаңылыктарды таратпастан, жаңы өсүп келе жаткан студенттер, жаш журналисттер үчүн таалим-тарбия берет. Алар Би-Би-Синин стандарттарына жакындаштарып берүүгө аракет кылышат. Ал тургай, КТРКнын журналисттери да Би-Би-Синин журналисттеринен көп нерсени үйрөнүп, өздөштүрүп алууга аракет кылышат. Ошондуктан партнер катары да, биздин көрөрмандарга да мааниси абдан чоң деп жоопкерчиликтүү түрдө айта алам .

Би-Би-Си: Би-Би-Си ТВ жаңылыктарынын КТРК аркылуу көрөрмандарга сунушталганына дээрлик төрт жылга таяды. Бул убакыт аралыгында кызматташтыктын КТРК үчүн үзүрү кандай болду деп баалайсыз?

И.Карыпбеков: Эми мен менеджер катары, жөн гана оозеки түрдө айта бербестен, сөзсүз түрдө эл аралык изилдөөлөргө таянып айтып келем. Би-Би-Синин жаңылыктары КТРКнын алдыңкы он программасына кирет. Деги эле Кыргызстанда саясий чөйрө абдан активдүү жана саясий багыттагы жаңылыктарга биздин көрөрмандардан талап көп болгондуктан жаңылыктарга басым жасалат, жаңылыктар абдан популярдуу болуп келет.

Ошондуктан Би-Би-Синин жаңылыктары КТРКнын жаңылыктары сыяктуу эле чоң мааниге ээ болуп, алдыңкы он программанын ичине кире алды. Бул мен үчүн да, жалпы кыргыз эли үчүн да кашкайып көрүнүп турат. Эми КТРКда канча деген гана программалар бар, анан ондуктун ичине кириш бул чоң жетишкендик деп ойлойм.

Би-Би-Си: Кыргызстанда телекөрсөтүү башталганына 60 жыл толуп атат, ошондо негизделген кичинекей телестудия өсүп жетип, килтейген корпорацияга айланды. Коомдук теле-радиоберүү корпорациясынын медиалык потенциалы бүгүн кандай?

И.Карыпбеков: КТРКнын медиа потенциалы аябай чоң. Көп учурда саясий багытта гана сын-пикирлер жана кеп-кеңештер айтылып келет. Бизде саясий багыттагы көрсөтүүлөр КТРКнын программаларынын 1,5% гана ээлесе, калган 98,5 % кыргыз маданиятынын, кыргызстандагы этникалык азчылыктарынын жашоо-турмушун, кыргыздын баалуулуктарын, бүт бардыгын чагылдырып келет. Спорт, социалдык тармак, тил, адабият, тарых, маданияттын бардыгын жүк катары көтөрүп келет. Бир дагы башка теле-радио компания көтөрө албаган жүктү КТРК көтөрүп келет да.

Би-Би-Си: ТВ жаңылыктарынын миссиясына кандай баа берет элеңиз? Себеби азыр социалдык медиа башкы сапка чыгып жатпайбы маалымат таркатууда, мисалы видео жагынан, кесипкөй ТВнин азыркы ролу кандай болушу керек?

И.Карыпбеков: Мен башында буга көп түшүнө берчү эмесмин, бирок азыр КТРКнын башында туруп жана медиа серепчилердин алдыңкысы катары айта турган болсом, телеберүу интернеттен эч качан артта калбайт. Азыркы учурда айтып атышпайбы: интернет басып кетип атат деп. Мен айтат элем, ТВдагы көрсөтүүлөр социалдык тармактардагы видеолорго караганда сапаты жагынан 40 % га жогору болот. Мындай сапатты бир дагы социалдык тармак бере албайт. Ошондуктан телестудияда даярдалган сапаттуу берүүнү телевидение гана бере алат. Атайын продакш студиялар гана бере алат, ошол эле Би-Би-Сиге, КТРКге окшогон медиалар. Социалдык тармактар эч качан телевидениени басып кете албайт. ТВнын келечеги чоң.

Тектеш темалар