Бишкекте атаандашсыз мэр шайлоого каршылык күчөдү

Шаардык кеңештеги фракциялардын сөлөкөтүн жасап көтөрүп чыккан активисттерди башында айтылуу Ɵндүрүш Токтонасыров бар.
Image caption Шаардык кеңештеги фракциялардын сөлөкөтүн жасап көтөрүп чыккан активисттерди башында айтылуу Ɵндүрүш Токтонасыров бар.

Баш калаанын башчысын шайлоого эки күн калганда кырдаал курчуй баштады. Бүгүн Бишкекте мэрге бир талапкер гана көрсөтүп, атаандашсыз шайлоо өткөрүп жатат деп шаардык кеңешке нааразы болгон активисттер акцияга чыгышты. Активисттер шаардык кеңештеги фракциялардын сөлөкөттөрүн жасап, көчөгө басып жүрүш жасашты.

Жарандык коом өкүлдөрүнүн нааразылыгы шаар мэрине тандалган талапкер Азиз Суракматовдун атаандашы жок баратканында. Шаардык кеңештеги коалициялык көпчүлүк Азиз Суракматовдун талапкерлигин көтөргөн. Ал эми азчылык эч кимди көрсөткөн эмес. Ошол эле учурда талапкер көрсөтүү укугу бар премьер- министр да эч кимди көрсөтпөдү.

Ошентсе да Бейөкмөт уюмдар ассоциациясынын жетекчиси Токтайым Үмөталиева өзүнүн талапкерлигин атаандаштык негизде көрсөттү. Бирок анын талапкерлигин БШК жана шаардык шайлоо комиссиясы каттабай жатат.

"Бишкек шайлоо комиссиясы, БШК мени каттагандан баш тартса, мен аларды сотко бергенге акым бар. Мен сотко бергенден кийин бул шайлоо токтошу керек. Анткени, альтернативдүү өкүл болбосо, шайлоо болбойт. Шайлоо - бул тандоо",-деди Токтайым Үмөталиева.

Бишкек шаарын буга чейин башкарган эки мэр Кубанычбек Кулматов менен Албек Ибраимов экөө тең коррупциялык иштер боюнча айыпталып, камакта жатат. Аларды дагы шаар кеңеши шайлаган. Жарандык коом активисттери буга чейин унчукпай келдик, азыр кийлигишпесек болбой калды деп жатышат.

Эксперттердин баамында, бийлик Бишкек жана Ош шаарларынын башчыларын эл тарабынан тикелей шайлоого азыр даяр эмес. Анткени аталган эки шаарда шайлоо болсо, жогорку бийлик сөзүн укпаган саясатчылар жеңип чыгышы мүмкүн дешет. Экинчиден, бийликтин 8-августка дайындалган шайлоону да токтотуп коюшу да арсар.

"Менин оюмча бул бийлик үчүн дагы стратегиялык талаа. Ошондуктан булар процессти токтотпойт. Ошол эле учурда азыркы жасап жаткан иштер дагы маанилүү. Бирок бул шайлоого жолтоо боло албайт. Анткен бул процесс жергиликтүү шайлоо менен партиялар мыйзамына өзгөртүү киргизгенге жол ачат деп ойлойм",-дейт жарандык активист Адил Турдукулов.

Жарандык активисттер ошондой эле Азиз Суракматовдун талапкер болуп катталышы мыйзамсыз болуп калган деп сотко кайрылган жатышат. "Биздин укук" уюмунун жетекчиси Калича Ѳмүралиева Суракматовдун курулуш компаниясы бар экенин эскертип, бул жерде кызыкчылыктардын кагылышы бар деп жатат.

Тектеш темалар

Тема боюнча башка макалалар