Кыргызстанда доллардын баасы эки күндөн бери кайрадан кескин көтөрүлүп, сомдун куну катуу түштү. Акча алмашуу пункттарында бейшембиде түштөн кийин доллардын баасы 85 сомго чыгып кетти. Бир күндөн кийин кайра төмөндөөлөр байкалды. Улуттук Банк акча курсундагы секирикти бири-бирине кошул-ташыл болгон көп факторлор менен түшүндүрүүдө.
Москвада 10-мартта рубль арзандагандан кийин саналуу сааттардан кийин Бишкекте сомдун куну түштү. Акыркы жылдары доллар 69 сомдун тегерегинде болуп келген, ал 10-мартта кеминде 73 сомго чейин жетти.
Дем алыштардан кийин Орусияда апта рублдун арзандашы менен башталды. Коронавируска байланыштуу арзандап жаткан рублдун кунун Орусиянын ОПЕК менен натыйжасыз сүйлөшүүлөрү кескин ылдыйлатты.
