Израилдин армиясы Газадагы аскердик аракеттерин күчөттү. Ал тапта палестиналык куралчан топтор бешинчи күн катары менен Израилди көздөй ракеталарын учурууда. Израилдин шаарларында болсо жөөт менен арабдардын ортосундагы кагылышуулар уланып жатат. Айрым саясатчылар өлкө жарандык согуштун алдында турарын айтууда.
Израилдик арабдар менен полиция кызматкерлери кагылышып, өкмөт Лод шаарына өзгөчө абал киргизди. Тель-Авив шаарына жакын жайгашкан Лод калаасында кагылышуу учурунда 12 адам жаракат алды.
Дүйнөнүн булуң-бурчундагы мамлекеттер Палестина менен Израилди сабырдуулукка чакырды. АКШ, Европа Биримдиги жана Британия эки тарапты тез арада жаңжалды токтотууга үндөдү.
Гаагадагы эл аралык сот (ICC) Палестин автоном аймагында аскер кылмышы катталган болушу мүмкүн деген билдирүүлөр боюнча расмий иликтөө башталганын жарыялады.
Бириккен Улуттар Уюмунун элүүгө чукул адам укуктары боюнча эксперттери Израилдин Батыш жээктин айрым аймактарын басып алганы "21-кылымдагы апартеид түзүлүшүнө" алып барат деп сындады.
Араб өлкөлөрү Израиль премьер-министри Биньямин Нетаньяхунун эгерде шайлоодо утуп чыкса, Батыш жээктин бир бөлүгүн аннексиялап алуу жөнүндө айткандарын катуу сынга алды.
