Лидерлердин көзүндөгү коркунуч жана жаш: Туск, Саркози, Меркель...

"Меркель аз жерден ыйлап жибере жаздады... Обама калдастап калды...Кэмерондун көзүндөгү коркунучту биринчи жолу көрдүм".

Сүрөттүн автордук укугу Getty Images
Image caption Бул кишилер акыркы он жылдыкта Европаны башкарышты. Эми болсо Саркози менен Туск Би-Би-Си тасмасына агынан жарыла сүйлөп беришти. 2010-жылдагы сүрөт

Саясатчылардын өтө оор кырдаалдагы абалы тууралуу бирин-бири сүрөттөп берген учурлары өтө сейрек эмеспи. BBC2 телеканалынын буйрутмасы менен тартылган "Европанын ичинде. 10 жылдык хаос" деп аталган жаңы документалдык тасма көрөрмандарга ушундай мүмкүнчүлүктү берет.

Үч бөлүктөн турган тасмада Батыш саясатчылары жана алардын жакын жардамчылары, тарапташтары соңку он жылдагы Европадагы эң негизги үч кризис тууралуу айтып беришет.

Булар: "Брексит", каржылык каатчылыкка кабылган Греция жана миграция кризиси.

Тасманы тартуу эки жылдай убакытты алды. Анда Франциянын мурунку президенти Николя Саркози, Франсуа Олланд, британ министри Уильям Хейг, Жорж Осборн, Евробиримдиктин мурдагы жана азыркы жетекчилери Херман ван Ромпей, Жан-Клод Юнкер жана Дональд Туск, Грециянын мурдагы премьер-министри жана каржы министри Георгиос Папандреу жана башка саясатчылар бар.

Сүрөттүн автордук укугу AFP
Image caption Сүрөттө 2015-жылдагы G7 саммити

Биринчи бөлүк "Брексит" - 2016-жылдагы Британиянын референдум аркылуу Евробиримдиктен чыгуу маселесине арналган.

"Мен Дэвид Кэмерондон эмне үчүн референдум өткөрүүнү чечтиңер, бул деген кооптуу го деп сурадым. Ал тургай келесоолук эмеспи. Анын жообу мени таң калтырды. Жападан жалгыз себеби анын партия алдындагы милдеттенмеси болуптур",-деп айтып берет тасмада Европа кеңешинин төрагасы Дональд Туск.

Тасманын экинчи бөлүгү гректердин 2010-жылдагы кризисине арналган. Мына ушул жерде "Чоң жыйырманын" жыйынында Меркель ыйлап жибере жаздап, Обама аны жубатуу үчүн артынан барганын Николя Саркози эскерип берет.

Image caption Норма Перси "Уотергейт", "Югославиянын кыйрашы", "Путин, Орусия жана Батыш" документалдык тасмаларынын автору. Эл аралык сыйлыктардын лауреаты

Үчүнчү бөлүк - Европадагы 2015-2016-жылдагы миграциялык кризис тууралуу. Бул жерде лидерлердин качкындар тууралуу карама-каршылыктуу позициялары эскерилген. (AbA)