Казакстанда жүргүнчү учак кырсыкка кабылды

Видеонун түшүндүрмөсү,

Кыйраган учак 1999-жылы түзүлгөн "Bek Air" компаниясына таандык

Казакстанда Bek Air авиакомпаниясына таандык жүргүнчү учагы кырсыкка кабылып, кеминде 12 киши каза таап, 35 жүргүнчү жаракат алганы айтылууда. Жаракат алгандардын көбү оор абалда деди дарыгерлер.

Расмий маалыматтарга караганда, Fokker үлгүсүндөгү учак Алматы аэропортунан көтөрүлгөн учурда кырсыкка кабылган. Алматы-Нур-Султан каттамындагы учак болгон. Абага көтөрүлгөн маалда бетон тосмого урунуп, эки кабат имаратты сүзгөн.

Ички иштер министрлиги кырсык болгон жерде 976 куткаруучу жана 33 "Тез жардам" бригадасы иштеп жатканын кабарлады.

Казакстандын президенти Касым-Жомарт Токаев кырсыктан каза тапкандардын жакындарына көңүл айтты. Кырсык иликтенип, ага жол бергендер жазаланат деди президент.

Сүрөттүн булагы, Reuters

Сүрөттүн түшүндүрмөсү,

Учак имараттардын үстүнө кулаган

Bek Air авиакомпаниясында Нидерланддарга таандык Fokker 100 үлгүсүндөгү учактар бар. Кырсыктан кийин Казакстандын бийлиги бул үлгүдөгү лайнерлердин учуусу токтотулганын билдирди.

Fokker 100 учагы 107 жүргүнчүгө ылайыкталган. 1986-жылы 30-ноябрда биринчи жолу абага көтөрүлгөн. Жалпысы болуп мындай үлгүдөгү 283 учак чыгарылган экен.

Сүрөттүн булагы, Getty Images

Алматыда кырсыкка кабылган учак 1996-жылдан тарта ишке берилип, 23,5 жылдан бери жүргүнчүлөрдү тейлеп келгени белгилүү болду.