भीमा कोरेगाव प्रकरण : कोण आहेत हे संभाजी भिडे हे सांगणाऱ्या 10 गोष्टी

संभाजी भिडे Image copyright Raju Sanadi
प्रतिमा मथळा संभाजी भिडे

भीमा कोरेगाव हिंसाचार प्रकरणात संभाजी भिडे आणि हिंदू एकता आघाडीचे मिलिंद एकबोटे यांच्या विरोधात पिंपरीत गुन्हा दाखल झाला आहे. अनुसूचित जाती जमाती अत्याचार प्रतिबंधक कायदा आणि सार्वजनिक नुकसान, सशस्त्र हल्ला, बेकायदेशीर जमाव या कलमांखाली हे गुन्हे नोंदवले आहेत.

या हिंसाचारानंतर संभाजी भिडे हे नाव पुन्हा एकदा चर्चेत आलं आहे. संभाजी भिडे नेमके कोण आहेत हे सांगणाऱ्या या 10 गोष्टी

1. संभाजी भिडे सांगलीत राहतात. त्यांचं वय 80 आहे. त्यांचे मूळ नाव मनोहर असं आहे. भिडे यांचं मूळ गाव सातारा जिल्ह्यातील सबनीसवाडी आहे.

2. राष्ट्रीय स्वयंसेवक संघाचे सांगलीतले तत्कालीन प्रमुख कार्यकर्ते बाबाराव भिडे यांचे ते पुतणे. संभाजी भिडे 1980च्या दशकात 'राष्ट्रीय स्वयंसेवक संघा'त कार्यरत होते. तसंच त्यांचं शिक्षण एमएस्सीपर्यंत झालं आहे, असं सांगलीतले ज्येष्ठ पत्रकार गणेश जोशी यांनी बीबीसी मराठीला सांगितलं.

Image copyright Raju Sanadi

जोशी म्हणाले, "संभाजी भिडे यांनी सांगलीत 'संघा'च्या बांधणीचं काम सुरू केलं होतं. पण काही वाद झाल्यानंतर त्यांची दुसऱ्या जिल्ह्यात बदली करण्यात आली. पण ते बदलीच्या ठिकाणी हजर झाले नाहीत. त्यांनी सांगलीमध्ये प्रतिसंघ स्थापला होता. तसंच संघाच्या दसरा संचलनाला पर्याय म्हणून दुर्गामाता दौड सुरू केली."

3. जोशी म्हणाले, "बाबरी मशीद आणि रामजन्मभूमी वाद उफाळला होता तेव्हा भिडे यांच्या 'श्री शिवप्रतिष्ठान हिंदुस्थान' या संघटनेला चांगला प्रतिसाद मिळू लागला. छत्रपती शिवाजी महाराज आणि छत्रपती संभाजी महाराज यांचा हिंदुत्ववादी संघटनांना अभिप्रेत असलेला इतिहास ते सांगतात."

राजकीय प्रतिष्ठा हवी असलेले समाजातील विविध स्तरांतील लोक त्यांच्या संघटनेत सहभागी झाल्याचं जोशी यांचं निरीक्षण आहे.

Image copyright Raju Sanadi

4. जून 2017 मध्ये पुण्यात ज्ञानोबा माऊली आणि तुकोबांच्या पालखी मार्गात अडथळा आणल्याचा आरोप भिडे आणि त्यांच्या कार्यकर्त्यांवर आहे.

5. 2009 मध्ये श्री शिवप्रतिष्ठान हिंदुस्थान आणि इतर काही संघटनांनी 'जोधा अकबर' या सिनेमाला विरोध केला होता. त्यातून सांगली, कोल्हापूर, सातारा या भागांत मोठ्या प्रमाणावर हिंसाचार झाला होता.

6. श्री शिवप्रतिष्ठान हिंदुस्थान या संघटनेची स्थापना 1984 ला झाल्याची नोंद या संघटनेच्या वेबसाईटवर आहे.

7. 'हिंदू समाजाची उगवती तरुण पिढी शिवाजी, संभाजी रक्तगटाची बनवणे हेच श्री. शिवप्रतिष्ठान हिंदुस्थानचे ध्येय आहे,' असं श्री शिवप्रतिष्ठान हिंदुस्थानच्या वेबसाईटवर म्हटलं आहे.

Image copyright Raju Sanadi
प्रतिमा मथळा संभाजी भिडे अनवाणी चालतात, असं सांगलीतील लोक सांगतात.

8. श्री शिवप्रतिष्ठान हिंदुस्थाननं रायगडावर 32 मण इतक्या वजनाच्या सोन्याचं सिंहासन बसवण्याचा संकल्प केला आहे. धर्मवीर संभाजी महाराज बलिदान मास, दुर्गामाता दौड, धारातीर्थ यात्रा, शिवराज्यभिषेक दिन असे विविध उपक्रम राबवले जात असल्याचं शिवप्रतिष्ठान हिंदुस्थानच्या वेबसाईटवर म्हटलं आहे.

9. सांगलीतल्या गावभाग परिसरात भिडे राहतात. सांगली येथील नागरिक मोहन नवले त्यांच्या शेजारीच राहतात. बीबीसी मराठीशी बोलताना ते म्हणाले की भिडे गुरूजी यांची राहणी साधी आहे.

10. पंतप्रधान नरेंद्र मोदी आणि भिडे यांची भेट 2014च्या लोकसभा निवडणुकीच्या प्रचारदरम्यान रायगड इथं झाली होती.

हे वाचलं का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.)