मराठा आरक्षण: MPSCचे अनेक परीक्षार्थी संभाजीराजेंवर का चिडलेत?

खासदार संभाजीराजे

फोटो स्रोत, Getty Images

राज्यातला कोव्हिडचा वाढता प्रादुर्भाव आणि मराठा आरक्षणाला आलेली स्थगिती या दोन्हींचा विचार करत 11 ऑक्टोबरला होऊ घातलेली MPSC ची परीक्षा पुढे ढकलावी अशी मागणी करण्यात येतेय. नवी मुंबईतल्या मराठा आरक्षण परिषदेतही खासदार संभाजीराजे छत्रपती यांनीही याविषयीचं वक्तव्यं केलं होतं.

MPSC ची तयारी करणारे विद्यार्थी परीक्षा व्हाव्यात का होऊ नयेत, याविषयीची मतं सोशल मीडियावर मांडत आहेत.

संभाजीराजे यांच्या वक्तव्यानंतर काही एमपीएससीच्या विद्यार्थ्यांनी नाराजी व्यक्त केली आहे. हे आमच्या भविष्यासोबत खेळणं झालं असं काही जणांचं म्हणणं आहे.

बीबीसी मराठीने या संदर्भात बातमी दिली होती. त्यावर विद्यार्थ्यांच्या संमिश्र प्रतिक्रिया आल्या आहेत. बीबीसीचे वाचक राम शिंदे म्हणतात की "आमच्या भवितव्याशी खेळू नका. मुलं 4-5 वर्षांपासून परीक्षेची तयारी करतात."

फोटो स्रोत, facebook

तुमच्या मताशी कुणीही सहमत असणार नाही अशी प्रतिक्रिया बाबा भवर यांनी दिली आहे. ते म्हणतात मुलं 5-6 वर्षं तयारी करतात आणि परीक्षा पुढे ढकलली तर त्यांचं नुकसान होऊ शकतं.

फोटो स्रोत, facebook

बाहेरगावी राहणारी मुलं फक्त एका परीक्षासाठी येऊन पैसा खर्च करतात. जर मुलांच्या परीक्षा पुढे जाव्या असं वाटत असेल तर त्यांचा खर्च तुम्ही उचलावा असं बाबा भवर म्हणतात.

काही जणांचं म्हणणं आहे परीक्षा पुढे ढकलल्यास वर्ष जाणार नाही. पण परीक्षा दिवाळीनंतर व्हायला हवी.

दिवाळीनंतर परीक्षा घेतल्यास तोपर्यंत कदाचित कोरोनाची परिस्थिती काहीशी निवळली असेल आणि मराठा आरक्षणावर तोडगा निघेल असं काहींनी म्हटलंय.

तर आरक्षणासोबतच कोव्हिडचा विचार व्हावा, ग्रामीण भागातले अनेक विद्यार्थी UPSC ला बसू शकले नाहीत, हे विचारात घ्यावं असं काहींचं म्हणणं आहे.

पण ही परीक्षा यापूर्वी तीनदा पुढे ढकलण्यात आलेली असल्याने विद्यार्थ्यांच्या मनःस्थितीचा विचार करत आता ही परीक्षा घ्यावी असंही काहींनी ट्वीट केलंय.

तर परीक्षा केंद्रापर्यंत कसं पोहोचायचं याचं नियोजन करावं लागत असल्याने सरकारने परीक्षा होणार की नाही हे आधीच जाहीर करावं, शेवटच्या क्षणी घोषणा करू नये, असाही विचार मांडण्यात आलाय.

परीक्षा अगदी चार दिवसांवर आलेली असताना सुरू असलेल्या या वादाचा परिणाम विद्यार्थ्यांच्या मनःस्थितीवर होत असल्याने लवकरात लवकर निर्णय घेण्यात यावा, असंही काहींनी म्हटलंय.

NEET, JEE परीक्षा पुढे ढकलण्यासाठी सुप्रीम कोर्टात जाणाऱ्या सरकारला MPSCची परीक्षा घेण्याची घाई का आहे, असाही सवाल काहींनी केलाय.

परीक्षांना करण्यात येणारा विरोध म्हणजे या विषयाचं राजकारण करण्यात येत असल्याचं मत काहीजणांनी मांडलंय.

MPSC ची परीक्षा वेळेवर होऊ द्यावी आणि दुसरीकडे मराठा आरक्षणाचा प्रश्न मार्गी लावावा असं मत मराठा समाजातल्याच काही मुलांनी मांडलंय.

गरजू उमेदवारांची महत्त्वाची वर्षं वाया जाऊ देऊ नयेत, परीक्षा होऊ द्याव्या आणि निकाल आरक्षणाप्रमाणे लावता येऊ शकतो, असं काहींनी म्हटलंय.

MPSC च्या परीक्षेसाठी 11 ऑक्टोबरची तारीख निश्चित करण्यात आलेली आहे. पण मराठा आरक्षणाच्या मुद्द्यावरून याबाबत खासदार संभाजीराजेंनी आक्रमक भूमिका घेतलेली आहे. राज्य सरकारने मराठा समाजाचं ऐकलं नाही, तर त्याचे गंभीर परिणाम भोगावे लागतील असा इशारा त्यांनी सरकारला दिला आहे.

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.रोज रात्री8 वाजता फेसबुकवर बीबीसी मराठी न्यूज पानावर बीबीसी मराठी पॉडकास्ट नक्की पाहा.)