Companaidh Cumhachd Comhairle nan Eilean Siar
- Published
Tha Comhairle nan Eilean Siar a' deasachadh airson Companaidh Chumhachd a stèidheachadh.
Bhiodh a' bhuidheann a' gabhail earrannan ann am pròiseactan cumhachd ath-nuadhachail agus a' reic dealain ri muinntir nan eilean agus tìr-mòr.
Tha oifigearan na Comhairle dòchasach gun urrainn dhaibh ceangail ri griod-dealain na Roinn Eòrpa a thathas a' moladh.
Dh'fheumadh cosgaisean son dealan a reic ris a' ghriod nàiseanta thighinn a-nuas son a dhèanamh èifeachdach.
Tha an luchd-leasachaidh a tha an sàs san tuath-gaoithe air talamh Urras Steòrnabhaigh a' tabhainn 20% de dh'earrannan sa phròiseact do mhuinntir an àite.
Tairgse
A-rèir oifigearan aig Comhairle nan Eilean Siar tha a h-uile coltas ann gun tèid gabhail ris an tairgse sin.
Thèid obair a thòiseachadh gus pàipear stiùiridh ullachadh airson Companaidh Giullachd Cumhachd nan Eilean Siar a chuir air dòigh.
Bheireadh seo cothrom don ùghdarras ionadail airgead a chur mu choinneamh phròiseactan cumhachd ath-nuadhachail ionadail.
Bhiodh cead aca cuideachd dealan a reic aig ìre ionadail agus cuideachd a reic do mhargaidhean air tìr-mòr.
Tha draghan ann ge-tà gum faodadh cosgaisean àrda do bhuidhnean sna h-eileanan airson ceangail dhan ghriod a bhith na chnap-starra.
Ach tha planaichean aig an Roinn Eòrpa airson griod fon mhuir a stèidheachadh, le ceangal dhan lìonradh far chosta Bharraigh.
Bhiodh sin a' ciallachadh gum biodh e tòrr na bu shaoire dealan às na h-eileanan a reic air feadh na Roinn Eòrpa.