Taghadh son Cupa MhicThàmhais

Sgioba Chinn a' Ghiuthsaich Image copyright Other
Image caption Bhuannaich Ceann a' Ghiuthsaich an fharpais an-uiridh

Chaidh an taghadh a dhèanamh an-diugh ann an Inbhir Nis airson na ciad chuairt de Chupa MhicThàmhais.

Cluichidh Ceann a' Ghiuthsaich, a thog an Cupa an-uiridh agus a' bhòn-uiridh, air falbh bhon taigh an aghaidh Chinn Loch Seile, an aon sgioba ris an coinnich iad air a' chiad là den t-seasan.

Tha taghadh nas fhasa aig an sgioba eile a bha sa chuairt dheireannaich an-uiridh, an Gearasdan. Cluichidh iadsan Caberfèidh bhon chiad roinn aig tuath, aig an taigh.

Chaidh Cupa MhicThàmhais - an fharpais airson nan sgiobaidhean aig tuath - a chluich airson a' chiad turais ann an 1898 is b'iad Camanachd an Eilein Sgitheanaich a thog an Cupa an turas sin.

Tòisichidh iadsan am bliadhna air falbh bhon taigh an aghaidh Shrath Ghlais, an taghadh sin agus am fear eadar Loch Abar is Loch Carrann an aon fheadhainn anns nach eil sgioba bhon Phrìomh Lìg.

Tha Baile Ùr an t-Sleibh agus Cill Mhàillidh anns an dara cuairt den fharpais mar thà.

Thèid na geamaichean an cluich air an là mu dheireadh den Mhàirt, is thèid a' chuairt dheireannach a chluich am bliadhna ann an Inbhir Nis air an 16mh den Chèitean.

An taghadh air fad.

Loch Abar v Loch Carrann

Gleann Urachadan v Inbhir Nis

An Gearasdan v Caberfèidh

Srath Glas v An t-Eilean Sgitheanach

A' Mhanachainn v Lobhat

Ceann Loch Seile v Ceann a' Ghiuthsaich

San dara cuairt mar thà

Baile Ùr an t-Sleibh, Cill Mhàillidh

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile