BBC Naidheachdan

Bogie a' glèidheadh ann an rèis a' Bhodaich-sneachda

Published
image copyrightOther
image captionGhlèidh Bogie is Rae an rèis ann an 2011 cuideachd.

Ghlèidh Dàibhidh Bogie agus Caoimhin Rae rèis ralaidh a' Bhodaich-sneachda air a' Ghàidhealtachd aig an deireadh sheachdain.

'S e seo an dàrna bliadhna an sreath a chèile a bhuannaich an dithis an rèis, 's iad ann am Mitsubishi EVO 9.

Rinn sneachda agus droch shìde cùisean doirbh do dhraibhearan.

Ach chuir Bogie agus Rae crìoch air na 6 earrannan ann an 50 mionaid is 3 diog - sin còrr is mionaid na luaithe na an dàrna càr.

'S e Mike Faulkner agus Peadar Foy a bha san dàrna àite ann an EVO 6.

Agus b' e am Ford Focus aig Peadar Mac an Tàilleir agus Anndra Roughead a thàinig a-steach san treas àite.

Cùisean doirbh

Ged a tha coltas ann gun d'rinn Bogie is Rae an gnothach gun cus trioblaid, tha iad ag ràdh nach robh e cho furasta sin.

"Tha sinn air ar dòigh ghlan", thuirt Bogie.

"Ach bha cùisean gu math doirbh - am measg an fheadhainn as miosa a chunnaic mise a-riamh.

"Tha a h-uile duine a fhuair timcheall a' chùrsa airidh air bonn.

Bha Faulkner co-ionnan ri Bogie anns a' chiad earrann, agus anns an dàrna àite anns an earrann mu dheireadh.

Thuirt e: "Bha sinn air ar rothaigeadh son seo a ghlèidheadh.

"'S e seo cho math 's a rinn sinn a-riamh sa Bhodach-sneachda, mar sin 's e toiseach tòiseachaidh math dhan t-seàsan a th'ann.