Brosnachadh Bhradan ann an Uisge Lòchaidh

Liathag Image copyright Other
Image caption Bidh mu mhillean iasg a bharrachd a' mealgachadh san abhainn gach bliadhna fon sgeama

Tha pròiseact a tha ag amas air togail a thoirt do dh'àireamhan a' bhradain ann an Uisge Lòchaidh air soirbheachadh.

Thòisich am pròiseact o chionn trì bliadhna, le bhith a' leigeil smalagan ma sgaoil, às dèidh dhaibh a bhith air an àrach ann an Loch Arcaig.

Tha Comann Uisge Lòchaidh ag obair còmhla ri Marine Harvest Scotland Eta. airson barrachd bhradan a chur dhan abhainn.

Falbhaidh na smalagan chun na mara gu dìreach, a' tilleadh an ceann bliadhna no dhà gus mealgachadh.

1,000,000 Bradan

Tha na smalagan air an toirt bho bhradain a tha dùthchasach don abhainn, agus tha eag sa ghaine orra mar chomharra gur ann mar phàirt den phròiseact a tha iad.

Leis gur iad smalagan a th' annta, cha tèid iad ann am farpais ris na th' ann de dh'iasg a thogadh anns an abhainn airson bìdh.

Thuige seo tha mu 18,000 smalag air an saoradh chun na h-aibhne gach bliadhna, ach tha dùil gun tèid leudachadh air sin ri linn 's cho soirbheachail 's a tha am pròiseact air a bhith.

Tha rannsachadh a rinn Comann Uisge Lòchaidh a' sealltainn gun do dh'èirich na chaidh a chur de mhealg san abhainn cha mhòr millean gach bliadhna tron sgeama-deuchainn.

A thuilleadh air sin tha 400 a bharrachd de dh'èisg mhealgachaidh air tilleadh chun na h-aibhne gach bliadhna, agus tha na chaidh a ghlacadh air èirigh 10%, le cuid de na bradain a chaidh a ghlacadh ann an 2011 air chuideam 20lb.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile