Sgìrean glèidhte ùra san amharc sa Chuan Sgìth

Air fhoillseachadh

Tha Riaghaltas na h-Alba a' moladh dà Sgìre Ghlèidhte Mara (Marine Protection Areas) a dhèanamh anns a' Chuan Sgìth.

Bhiodh tè dhiubh an teis meadhan aon de na h-iolaichean as fheàrr a th' ann airson a' mhaosgain-chaoil, faisg air na h-Eileanan Mòra.

Bhiodh an tè eile a' sìneadh bho bheul Loch Steòrnabhaigh mun Rubha agus suas gu ruige Nis.

Fo-thiotal a’ bhidio, Dà sgìre ghlèidhte mara gam moladh

Tha companaidhean leasachaidh a' coimhead ri tuathan-gaoithe a stèidheachadh far an deadh an dàrna sgìre a chomharrachadh.

"An tè a tha a' cur uallach as motha oirnne an-dràsta 's e gu bheil iad air àite mòr a dhealbh a-mach tuath air na h-Eileanan Mòra, a' tighinn suas gu beul Loch Steòrnabhaigh, agus chanainnsa timcheall air 30 mìle de leathad ann a-null an Cuan Sgìth," thuirt Rùnaire Chomann Iasgairean nan Eilean Siar, Donnchadh MacAonghais.

"Nan deadh sin air adhart gu ìre, chanainnsa gu bheil na milleanan de luach-airgid a' mhaosgain-chaoil a' tighinn às, agus chan eil mise a' faicinn nach e buille bàis a bhiodh ann dha na tràlaran ann an Steòrnabhagh agus dha luchd-giollachd a' mhaoraich, nan deadh tràladh a chasg ann," thuirt e.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh