Loidhne-rèile fosgailte a-rithist

Dealbh a chaidh a thogail goirid às dèidh na maoim-slèibhe.

Dh'fhosgail an loidhne-rèile eadar Inbhir Nis is an Aghaidh Mhòr as ùr, as dèidh dhi a bhith dùinte fad ceithir làithean.

Chaidh an loidhne a dhùnadh Dihaoine às dèidh maom-slèibhe ri taobh na loidhne eadar an Sloc agus Drochaid Charra.

Chuir ScotRail busaichean air dòigh eadar An Aghaidh Mhòr is Inbhir Nis fhad 's a bha obair-càraidh ga dhèanamh air an loidhne.

Bha aca ri 2,000 tonna de chreig a chleachdadh gus an talamh ri taobh na loidhne a neartachadh.

Dh'fhosgail an loidhne oidhche Mhàirt is thuirt ScotRail gu bheil seirbheisean a-nis air tilleadh dhan abhaist.