Pròbhost ùr Inbhir Narainn

Chaidh tiotal a' Phròbhoist a bhuileachadh air a' Chomh. NicDhòmhnaill às ùr an t-seachdainn-sa

'S i an Comhairliche SNP Liz NicDhòmhnaill Pròbhost ùr Inbhir Narainn, às dèidh dhith an dearbh obair sin a chall bho chionn dà bhliadhna.

Chaill i an dreuchd ann an 2010, nuair a chaidh na comhairlichean eile sa bhaile, a bha uile an lùib na co-bhonntachd a bha a' riaghladh Chomhairle na Gàidhealtachd aig an àm, na h-aghaidh.

Bha iad mì-thoilichte gu robh i air cur an aghaidh phlana gus amar-snàimh a' bhaile a dhùnadh.

Thuirt an Comh. Dhòmhnallach gu robh i gu math toilichte an dreuchd fhaighinn às ùr, agus gum biodh i a' feuchainn ri guth nas làidire a thoirt dhan sgìre taobh a-staigh na Comhairle.