Ceist mu stèiseanan smàlaidh

Thog Coimisean nan Cunntasan grunn laigsean mu sheirbheis an smàlaidh air a' Ghàidhealtachd.

Chuala Bòrd Slàinte na Gàidhealtachd 's nan Eilean gu bheil còig stèiseanan smàlaidh coimhearsnachd san sgìre nach eil fhathast aig ìre a tha freagarrach airson an cumail a' dol.

Choinnich am Bòrd son a' chiad uair bho chaidh comhairlichean ùra a thaghadh nam buill.

'S e cothrom a bh' ann cluintinn mu mar a tha a' dol dhan t-seirbheis, is Coimisean nan Cunntasan air càineadh a dhèanamh oirre ann an aithisg nas tràithe air a' bhliadhna.

Thog iad grunn cheistean mu thrèanadh smàladairean agus mu shlàinte is sàbhailteachd, am measg eile.

Dh'innis àrd-oifigearan smàlaidh dha na buill gu bheil iad a' dèanamh oidhirp gus an t-seirbheis a ghluasad a-mach às an staing sin.

Adhartas

Tha iad air adhartas a dhèanamh le trèanadh agus sàbhailteachd thogalaichean leithid ospadalan agus dachaighean cùraim.

A dh'aindeoin sin ge-tà, chaidh innse nach eil na stèiseanan smàlaidh ann an Slèite, Coit a' Ghartain, Foula is Out Skerries ann an Sealtainn, is Flotta ann an Arcaibh aig an ìre a bu chòir.

Chuala am Bòrd Smàlaidh gun tèid feuchainn ris na stèiseanan air fad a thoirt gu ìre.

Tha ceist ann cuideachd mu dhèidhinn cò nì rannsachadh air ciamar a chaidh an t-seirbheis cho fada ceàrr sa chiad dol a-mach.

Cho-dhùin seann Bhòrd Smàlaidh na Gàidhealtachd gur e rannsachadh neo-eisimeileach a bhiodh ann, air a dhèanamh le comhairle eile, ach thuige seo cha d'fhuaireadh buidheann.

Thèid oidhirp eile a dhèanamh comhairle eile a lorg a nì an sgrùdadh.