Bun-sgoil ùr do dh'Uibhist a Tuath?
- Air fhoillseachadh
Tha Comhairle nan Eilean Siar deiseil son a dhol gu Riaghaltas na h-Alba a dh'iarraidh taic-airgid son bun-sgoil ùir do dh'Uibhist a Tuath a bhiodh an àite nan trì bun-sgoiltean a th' ann an-dràsta.
Chan eil cinnt aig an ìre seo dè chosgadh an sgoil ùr ach tha pròiseact den aon sheòrsa ann an Uibhist a Deas an-dràsta a' cosg £10m.
Tha dòchas ann gun tèid cùmhnant nas fàbharaiche na sin fhaighinn agus companaidhean togail a' strì son obair le buaidh a' chrìonaidh eaconamaich.
Thèid plana son sgoil ùr a thogail ann an Uibhist a Tuath a dheasbad le làn-Chomhairle nan Eilean Siar Diardaoin.
Tha an t-ùghdaras ionadail an dùil tagradh a chur gu Riaghaltas na h-Alba 's iad a' sireadh taic-airgid bho stòras an Scottish Futures Trust.
Thuirt fear de chomhairlichean an àite, Uisdean Robasdan, gum bi aon bhun-sgoil ùr nas fhreagarraiche na na trì a tha san sgìre an-dràsta.