Duaisean Urras Iain Muir
- Air fhoillseachadh
Thàinig leudachadh air Duaisean Urras Iain Muir agus cùrsa ga chumail tro mheadhan na Gàidhlig son a' chiad uair.
Tha Duaisean Urras Iain Muir air a bhith a' ruith fad còig bliadhna deug, a' toirt cothrom do dhaoine òga barrachd eòlais a chur air monaidhean is coilltean mun cuairt orra.
'S e clach-mhìle a bha sa chiad chùrsa Ghàidhlig.
Chruinnich deugairean à grunn àrd-sgoiltean air feadh na Gàidhealtachd aig campa ann an Loch Abar agus chuir iad ceithir là seachad air a' bhlàr a-muigh.
Còmhla riutha bha riochdaire bho Chommun na Gàidhlig, Dòmhnall Morris.
''Tha iad a' dèanamh tòrr an-drasta a thaobh a bhith a' coimhead air craobhan, na diofar seòrsaichean a th'ann".
"Tha sin mar phàirt dhen dealbh mhòr a th'againn airson nan sgirean dùthchail", thuirt e.
Nàdar
Thathas ag amas air a' Ghàidhlig a bhrosnachadh, a bharrachd air eòlas air nàdar a thoirt seachad.
'S e rud cudromach a tha sin, a rèir Dhòmhnaill Morris.
''Tha diofar ìrean do Ghàidhlig againn an seo agus 's e slighe fhada a th'ann".
"Tha sinn ag amas gum bi na daoine seo a' bruidhinn agus bàidheil dhan Ghàidhlig san àm ri teachd", thuirt e.
Chord an cùrsa glan ri na daoine òga a bha an-sàs ann, a dh'aindeoin droch shìde agus a' mheanbh-chuileag
Agus chan ann mu dhèidhinn coiseachd chruaidh ann an droch aimisir a-mhàin a bha an gnothach - le spòrs, ceòl agus fealla-dha gu leòr ann cuideachd.