Hub Slàinte ùr dhan Tairbeart

An Tairbeart Image copyright Undiscoverd scotland
Image caption Hub slàinte ùr dhan Tairbeart

Tha Bòrd Slàinte nan Eilean Siar ag ràdh gum bu mhath leotha mòr-ionad, neo "hub" slàinte, a stèidheachadh sna Hearadh le bhi a' leasachadh togalach air an Tairbeart mar ionad fiaclaireachd.

Bha seann ionad fiaclaireachd an Tairbeirt anns an t-seann osdail a chaidh a leagail gu làr bho chionn ghoirid.

Bha dà roghainn ga dheasbad leis a' bòrd slàinte an-dè air ciamar a bu chòir seirbhisean fiaclaireachd na sgìre a thoirt air adhart.

Bha iad le chèile a' cuairteachadh seann taigh an dotair sa bhaile, seann togalach cloiche a tha làimh ri ionad an dotair.

Se an togalach a leasachadh mar ionad fiaclaireachd a' chiad roghainn aca.

Chosgadh seo £433,000 agus chruthaicheadh e "mòr-ionad" neo "hub" slàinte anns an gabhadh seirbhisean eile a thoirt seachad.

Bha iad cuideachd a' beachdachadh air an t-seann taigh a leagail 's togalach ùr a chur na àite.

Chosgadh sin cha mhòr £500,000 not dhaibh.

Dragh san sgìre

Bha dragh anns an sgìre mun roghainn sin, 's daoine amharasach mu dè seòrsa togalach a dheadh a chur an àrd an àite an t-seann taigh.

Cho-dhùin am bòrd a' chiad roghainn a thoirt chun ath ìre dhealbhachaidh.

San eadar-ama thèid seirbhisean fiaclaireachd a thoirt seachad aig clionaig Scalpaigh.